Fondi “Elliott” dhe drejtori Leonardo vijojnë më ritme të larta punën për përforcimin e Milanit në kuadër të sezonit të ri.
Pas afrimit nga Juventusi të dyshes Higuain-Kaldara dhe Bakajokos nga Çelsi, drejtuesit kuqezinj i kanë kthyer radarët nga Roma në kërkim të një tjetër përforcimi.
Me sa duket, Maldini dhe Leonardo do të tentojnë në ditët e mbetura transferimin e një tjetër elementi shumë të lakmuar në merkatos.
Objektivi- Duke u rikthyer te drejtori teknik i “Djallit”, ai dëshiron me çdo kusht Sergej Milinkoviç-Saviçin. Drejtuesit e Lacios do të lejonin largimin e serbit vetëm për 120 milionë euro.
Me UEFA-n që i qëndron mbi kokë, “Djalli” nuk mund të bëjë një shpenzim të tillë, ndaj do të përpiqet të veprojë si me Higuanin.
Drejtuesit e Milanit po mendojnë për një huazim me të drejtë blerjeje të mesfushorit. Në ofertë do të përfshiheshin edhe dy futbollistë nga organika në dispozicion të Xhenaro Gatuzos.
Plani- Sipas “Corriere dello Sport”, Leonardo ka përgatitur një ofertë fillestare prej 40 milionë eurosh për ta huazuar fillimisht 23-vjeçarin.
Falë të drejtës së blerjes, Milani do të duhej të derdhte në fund të sezonit edhe 55 milionë euro të tjera në arkat e Lacios, ku do të përfundonin edhe dy futbollistë kuqezinj.
Me shumë gjasa, njëri syresh do të ishte Fabio Borini që vitin e kaluar monitorohej nga bardhekaltërit, teksa profili i dytë mbetet ende për t’u përcaktuar.
Në bisedime, përveç Igli Tares dhe Leonardos, janë përfshirë edhe krerët më të lartë të klubeve.
Kontakte- Bëhet e ditur se fondi “Elliott” ka dërguar në Kortina dy përfaqësues ligjorë për të thelluar diskutimin me presidentin e Lacios, Klaudio Lotito, i cili vijon të ngulmojë në pretendimin e tij duke synuar 120 milionë euro.
Kuqezinjtë nuk e disponojnë shumën në fjalë aktualisht dhe për më tepër janë nën vëzhgim nga UEFA për çështje të lidhura me bilancin.
“Djalli” nuk mund të bëjë shpenzime të tepërta, pasi rrezikon sanksione, ndaj Leonardo dhe Maldini synojnë një marrëveshje huazimi, në mënyrë që ngarkesa ekonomike të ndahet në të paktën dy sezone.
