Milani vuajti shumë përballë Chievos në “San Siro”, por në fund arriti të merrte një fitore të vyer 3-2, që e mban në garë për zonën Champions.
Kuqezinjtë e Montellas, që vinin pas eliminimit nga Arsenali në Europa League, gjetën golin e parë që në minutën e 10-të me Calhanoglu, por Chievo jo vetëm që arriti të barazonte me Stepinskin (33’), por vetëm një minutë më pas kaloi në epërsi me Inglesen.
Cutrone ktheu baraspeshën në të 54-ën, ndërsa Andre Silva shënoi golin e fitoren për Milanin 8 minuta para përfundimit të kohës së regullt.
Pasi iu referua teknologjisë VAR, kryesori akordoi 11-metërsh për Milanin në kohën shtesë, por Kessie u tregua i pasaktë përballë portierit Sorrentino.
Fitore e lehtë 0-2 e Romës në fushën e Crotones, me autorë të golave El Shaarawy dhe Nainggolan.
Fiorentina regjistroi fitoren e dytë radhazi pas vdekjes tragjike të Astorit. Skuadra vjollcë triumfoi 1-2 në fushën e Torinos me gola të Veretout dhe Thereau, ndërsa për vendasit barazoi përkohësisht rezultatin Belotti.
Duhet theksuar fakti që në pjesën e parë Veretout humbi një 11-metërsh për Fiorentinën.
Atalanta, ku aktivizohet Etrit Berisha, shkatërroi 0-5 Veronën, në një sfidë ku spikati me një tregolësh Ilicic (një gol e shënoi me penallti), ndërsa plotësuan listën e golashënuesve Cristante dhe Gomez.
Zhgënjeu në fushën e saj Benevento, që u mposht 1-2 nga Cagliari. 90 minuta në fushë qëndroi mbrojtësi kuqezi Berat Gjimshiti, ndërsa Memushaj ishte në stol dhe nuk u preferua as si zëvendësues nga trajneri i Beneventos.
