Andri Shevçenko dhe Kristian Panuçi nuk do të jenë shumë të kënaqur, por FIFA ka vendosur që ndeshja mes Shqipërisë dhe Ukrainës duhet të zhvillohet në stadiumin e Evianit, me apo pëlqimin e dy trajnerëve.
Impianti i vogël që përdoret për stërvitje (nga vetë Ukraina gjatë kësaj jave), do të presë ndeshjen e caktuar më datën 3 qershor, pasi organizata ndërkombëtare i ka dhënë të drejtë organizatorit të takimit që ka përzgjedhur këtë stadium kur u ka bërë ofertën të dy skuadrave.
Shevçenko kishte shfaqur pakënaqësi për stadiumin që nuk ka një tribunë të mirëfilltë tifozësh, e të njëjtin mendim, sipas tij, ndante edhe Panuçi.
Por ankesa në FIFA nuk ka shërbyer asgjë, pasi ndërkombëtarët mendojnë se dy palët duhet të respektojnë kontratën.
Kësisoj, mbrëmë u është konfirmuar në rrugë zyrtare se ndeshja do të luhet të dielën në orën 16:00 dhe nëse Ukraina pastaj vendos ta bojkotojë sfidën, atëherë do të duhet të paguajë një dëmshpërblim të rëndë.
Me pak fjalë, të dielën do të shohim një ndeshje të cilën asnjëra skuadër nuk dëshiron ta luajë, në një fushë të papërshtatshme, në një stadium të papërshtatshëm, në një orar të papërshtatshëm.
Përgatitje më të mira se kaq për Ligën e Kombeve vështirë se mund të bënim…./vipsport.al/
