Këshilli Bashkiak Shkodër sot me 32 vota pro dhe 6 kundër ka miratuar buxhetin e Bashkisë për vitin 2019. Rrjedhimisht është miratuar edhe fondi që do të shkojë për Klubin e Futbollit Vllaznia. Ky i fundit do të përfitojë shumën prej 450 milionë lekësh të vjetra.
Një shumë që ndoshta mund të mos jetë e mjaftueshme për të përballuar siç duhet gjithë vitin e ardhshëm megjithatë këshilltarët që janë prononcuar në lidhje me këtë çështje, kanë deklaruar se “meqenëse Vllaznia aktualisht në kategorinë e parë, fondi është mëse i mjaftueshëm”.
Por të mos harrojmë se viti 2019 përshin edhe ngjitjen e mundshme të ekipit në Superligë dhe për këtë arsye fondi mund të ketë nevojë ndoshta për rritje. Gjithsesi e rëndësishme është që këtë herë nuk ka patur shumë diskutime në lidhje me futbollin.
Miratimi në total i buxhetit të Bashkisë Shkodër , ndoshta e ka shpërndarë vëmendjen edhe në faktorë të tjerë të tij por e rëndësishme është që ky institucion garanton edhe njëherë tjetër mbarëvajtjen e ecurisë së punëve tek Klubi i Futbollit Vllaznia. Tashmë detyra për të është ngjitja e ekipit në Superligë.
© shkodrasport.com
