Nga Endri ÇINARI
Vllaznia e mbylli në shifrat 0-0 përballjen e javës së 30-të të kampionatit kundër Partizanit. Dueli direkt për vendin e dytë të renditjes u luajt ditën e djeshme në “Air Albania”. Ku të dy ekipet u ndanë në “paqe” mes tyre duke pranuar në fund nga 1 pikë për secilën palë. Një ndeshje që kishte pritshmëri të larta, por që nuk u ngrit asnjë moment në nivelin e duhur.
Kjo pasi rastet ishin me pikatore nga të dy skuadrat, që më tepër u kujdesën që të mos pësonin gol. Madje në një duel që prodhoi pak lojë efektive, ishte Vllaznia që kishte dy radte ideale.
Fillimisht me Alivoden në pjesën e parë, ku mesfushori kishte një penallti në lëvizje dhe nuk arrit të shënonte. E akoma ndoshta më flagrant ishte edhe rasti i Çobes në pjesën e dytë, që u “hipnotizua” nga Qirko.
E pavarësisht se loja nuk ishte e kënaqshme në rradhët e kuqebluve, ata e arritën “misionin” e tyre ditën e djeshme. Kjo për të mbajtur larg me 3 pikë ekipin e Partizanit. Ku “demat” janë ndjekësit më të afërt të kuqebluve. Tashmë me këtë barazim, Vllaznia i ka fatet e kampionatit në këmbët e veta. Sepse kuqeblutë për të ruajtur vendin e dytë në fund të edicionit, do varen vetëm nga rezultatet e tyre.
Me 6 ndeshje deri në përfundimin e edicionit të rregullt, 9 herë kampionët e vendit do kenë 3 duele shtëpiake dhe 3 në transfertë. Patjetër që të gjitha ndeshjet e ngelura janë me kundërshtarë që nuk duhen nënvlerësuar aspak. Kjo sepse në Superiore po luftohet për çdo objektiv të mundshëm dhe asnjë prej ekipeve nuk ka siguruar ende asgjë deri në këtë pikë të sezonit./www.shkodrasport.com/
