Java e tetë kulmoi me kryendeshjen VllazniaTirana, që u zhvillua në fushën asnjanëse të Kukësit. Pikërisht në “klasike” pati edhe rastet më flagrante, por gjithashtu në ndeshjet e tjera nuk munguan momentet e diskutueshme, që zbulojnë gabimet e arbitrave. “Panorama Sport” ju sjell të gjitha rastet.
Ndeshja në Kukës u gjykua nga Enea Jorgji, ndërsa në VAR ishin Kreshnik Bajramaj dhe Orlando Kuka. Rastet për moviolë ishin tri, nga ku mungon një penallti për shkodranët.
31’ Vllaznia pretendon për prekje të topit me dorë nga Jonuzi në afërsi të zonës pas devijimit të Juriçit. Jorgji vijon lojën dhe më pas merr sinjalizim nga VAR-i, që nuk kemi të bëjmë me penallti. Rast i dyshimtë, me Jonuzin që po del nga zona. Pamjet filmike nuk janë të pastra, por edhe nëse jepej faull, ishte jashtë zone.
68’ Boshnjaku zotëron topin dhe futet në zonë, por Hila në intensitet, ndërhyn dhe e shtyn mesfushorin e Vllaznisë, i cili rrëzohet dhe kërkon penallti. Për Jorgjin nuk kemi të bëjmë me 11- metërsh, por pamjet filmike tregojnë se lojtari i Tiranës nuk është i interesuar për topin.
Kësisoj, i ka shkaktuar faull Boshnjakut dhe në këtë rast duhej dhënë penallti për shkodranët. Jorgji ka pasur pamje të qartë, por nuk e ka konsideruar të tillë, ndërsa s’ka kërkuar as ta shohë në monitorin e VAR-it.
82’ Smajli pengon Haxhiun në mesfushë, duke shkaktuar një faull taktik pas një kundërsulmi të Tiranës. Mbrojtësi merr kartonin e dytë të verdhë dhe lë me 10 lojtarë shkodranët. Vendim i drejtë i Jorgjit.
