Nisja e kampionatit për Vllazninë është shumë e mirë dhe pas dy fitoreve të arritura prej saj, ajo me meritë kryeson renditjen. Shumëkush mendon se ekipi shkodran ka qenë me fat sepse ka patur përballë kundërshtarë të dobët në këto dy javët e para, por krejt ndryshe mendon Shkëlqim Muça.
Gjatë analizës së tij në “Rubrika Sportive”, ai ka vlerësuar mënyrën si Vllaznia po luan duke e konsideruar këtë skuadër si dinjitoze për ecurinë e mëtejshme në kampionat.
“Vllaznia më befasoi me lojën që zhvilloi ndaj Skënderbeut, madje edhe me atë ndaj Apolonisë, por më shumë me këtë në Korçë. Tek kjo skuadër duket dora e stafit të ri, e trajnerit të ri, e frymës së re.
Shikoj në fushë një skuadër që është e etur për të luajtur, ka shumë dëshirë. Futbollistët e Vllaznisë vrapojnë gjatë gjithë lojës. Ndaj Skënderbeut pashë një qëndrueshmëri taktike nga minuta e parë dhe deri tek e fundit.
Skuadra luajti pothuajse njësoj përgjatë gjithë kohës, pashë futbollistë që nuk dilnin nga detyrat e tyre, një ekip i organizuar si në aspektin mbrojtës ashtu edhe në atë sulmues.
Nuk është se kishte përballë një kundërshtar të dobët pasi për Skënderbeun javën e kaluar folëm me superlativa për paraqitjen e tij ndaj Teutës. Nuk jam dakord me atë se Vllaznia dy ndeshjet e para i pati të dobëta. Të gjithë ekipet duan përqendrim dhe nuk ka ekipe të vogla e të mëdha.
Unë konstatoj se tek skuadra shkodrane ndihet dora e trajnerit dhe e stafit të tij dhe ajo është e kolauduar mirë. Ndonëse fillimi i kampionatit zgjati shumë, Vllaznia arriti të ruajë formën dhe të jetë në gjendjen optimale taktikisht dhe në çdo drejtim tjetër”./SHKODRA-SPORT.COM/
