Nga Endri ÇINARI
Vllaznia do ketë një sfidë delikate me rikthimin e Superiores. Shkodranët do jenë përballë Laçit, ditën e premte në orën 17:00. Me duelin që do luhet në stadiumin “Loro Boriçi”. Ku kuqeblutë patjetër do kërkojnë reagimin para publikut të tyre dhe pas një periudhe plot ulje dhe ngritje.
Skuadra duket se është e plotë, me disa prej lojtarëve që kanë lënë pas problemet fizike. Por shkodranët ndaj kurbinasve do vuajnë mungesën e lojtarit kryesor të tyre. Fjala është për Bekim Balajn, ku autori i 8 golave këtë edicion në kampionat nuk do jetë në duelin e javës së 13-të. Kjo si pasojë e plotësimit të numërit të kartonave.
Opsioni i parë për të zëvendësuar shtatlartin është Bruno Gomes. Braziliani i cili ka vuajtur dëmtimet që nga fillimi i sezonit duket në gjendje optimale fizike dhe sportive. Ku këtë e vërtetoi edhe ndeshja mes grupit, ku sulmuesi shënoi 3 gola. Por një opsion tjetër mund të jetë edhe Ildi Gruda.
Pavarësisht se nuk është një sulmues tipik, 23-vjeçari e ka bërë disa herë në të shkuarën rolin e 9-tëshit. Dhe sulmuesi i shpejtë mund të jetë një alternativë tjetër për ndeshjen ndaj Laçit. Megjithatë për të parë se kush do e udhëheqë sulmin kuqeblu duhet të presim deri të premten, ku Vllaznia do zbresë në fushë për të tentuar një kthesë në kampionat.
