Prania në finalen e Ligës së Konferencës në Tiranë ka kthyer protagonist në mediat ndërkombëtare Zhoze Murinjon dhe sidomos në Angli, ku ai ka shkruar historinë me klube si Çelsi e Mançester Junajtid. Një ish-futbollist i tij në vitet e arta te Çelsi, sulmuesi Xho Kol, ka kujtuar një histori mjaft interesante me mënyrën se si Murinjo menaxhonte asokohe situata në klub.
“Zhoze ishte më i miri për t’i ulur hundën një lojtari”, kujton Kol, i cili ka treguar një ngjarje në të cilën kishte qenë vetë dëshmitar në dhomat e zhveshjeve të Çelsit. “Rikardo Karvajo, padyshim një lojtar i madh, kishte një përplasje me Zhoze rreth një gjëje, nuk luajti dhe pas ndeshjes Zhoze i tha:
‘Nuk do të kthehesh kurrë më të luash për mua, nuk do të luash kurrë! Xhon Terri, numri një, Gallas numri 2, Robert Huth numri 3, i ri, numri katër… nëse vjen magazinieri, luan Mik, para teje!’”, kujtoi Kol fjalët e Murinjos. “Mik ishte një burrë 50-vjeçar me bark të madh i cili ishte nga Derbi”, shpjegoi duke qeshur ish-futbollisti.
Murinjo dhe Karvajo bënë paqe pas disa vitesh kur iu ritakuan përsëri te Real Madrid dhe së bashku fituan një La Liga, një Kupë Mbreti dhe një SuperKupë Spanje.
