Napoli duket se ka zgjedhur trajnerin e ri, edhe pse nuk është vendosur zyrtarisht ende shkarkimi I Rudi Garsia. Ditët e tij në klubin napolitan kanë marrë fund dhe sapo Aurelio De Laurentis të finalizojë marrëveshjen me emrin e ri të pankinës, do t’i japë duart francezit.
Mediat italiane bëjnë të ditur se presidenti i Napolit është takuar sot në zyrat e tij në Romë me Igor Tudor. Kroati është kandidati kryesor për pankinën dhe palët janë të interesuara për një bashkëpunim.
Gjithçka në parim, pasi në të vërtetë ka dy çështje që duhen zgjidhur. E para është se Napoli ofron kontratë deri në fund të sezonit me të drejtën e klubit për ta zgjatur edhe një edicion. Kurse Tudor do një kontratë të paktën deri në verën e vitit 2025.
Njëkohësisht, De Laurentis kërkon garanci për skemën që do të përdorë ish-mbrojtësi i Juventusit. Tudor preferon një rreshtim me 3 apo 5, në varësi të ndeshjeve dhe me lojtarët në dispozicion, vështirë se ka mundësi ta aplikojë një gjë të tillë. Ndaj De Laurentis kërkon që skuadra të vazhdojë me të njëjtin rreshtim taktik në këtë sezon të paktën, duke kërkuar garanci nga trajneri në këtë aspekt.
Kontaktet mes palëve vazhdojnë dhe nuk është çudi që gjatë ditës së sotme të bëhet si fillim zyrtarizimi i largimit të Rudi Garcias, i cili është kthyer në Francë pasi është i ndërgjegjshëm se nuk do të jetë ai në drejtimin e ekipit kur të rifillojë stërvitjet të mërkurën.
