Sot, pas një sëmundje të rëndë, është ndarë nga jeta në moshën 76 vjeçare ish-futbollisti i Tiranës, Vllaznisë dhe Kombëtares, një prej figurave më të spikatura të futbollit shqiptar, Ali Mema.
Ali Mema do të mbetet në memorien e sportdashësve shqiptar si një nga mesfushorët më të shkëlqyer të brezit të Tiranës së viteve 60-70, teknik dhe shumë virtuoz, duke u cilësuar si një nga më të mëdhenjtë e brezit të tij.
Tek Vllaznia ka luajtur nga vera e vitit 1966 deri ne fund te vitit 1967, periudhe kur ai ka kryer sherbimin ushtarak. Pikerisht per kete kontribut, ai pak vite me pare u nderua me titullin “Mirenjohja e Qytetit” nga Keshilli Bashkiak Shkoder.
Të shkëlqyera kanë qenë dhe paraqitjet e tij me ekipin kombëtar ku ka dhënë një kontribut të jashtëzakonshëm. Për shumë vite me rradhë Mema ju dedikua trajningut duke qënë në krahun e ish trajnerit të Tiranës Enver Shehu.
“Të dashur miq të familjes së madhe të futbollit, me hidhërim kam mësuar lajmin e trishtë të ndarjes nga jeta të Ali Memës, një ish-mesfushor i shkëlqyer i Tiranës dhe ekipit kombëtar, drejtues futbolli dhe mik i mirë. Në këtë moment hidhërimi për futbollin shqiptar dua ti shpreh ngushëllimet më të sinqerta familjes dhe të afërmve.
Ai ishte një ikonë e futbollit shqiptar dhe një nga më të ndriturit e familjes simbol të futbollit të Tiranës, dhe si i tillë do të kujtohet gjithmonë nga komuniteti futbollit”, ka deklaruar Presidenti i FSHF-së Armand Duka, sapo ka mësuar lajmin e dhimbshëm.
Homazhet në nderim të Ali Memës do të zhvillohen nesër, datë 27 mars 2019, nga ora 10:00-12:00 në ambientet e stadiumit “Selman Stërmasi”.
