Nëse në shumë skuadra e ulin ritmin në fundin e sezonit, sidomos pasi dalin jashtë objektivave, te Partizani nuk ndodh diçka e tillë.
Klevis Dalipi kërkon përditë ‘xixa’ në stërvitje, madje nuk kursehet duke nxjerrë jashtë dhe titullarë të rëndësishëm të skuadrës.
Situatë që rrallë herë më parë e kemi ndeshur te të kuqtë, por që çuditërisht në harkun e një muaji kanë ndodhur ngjarje aq sa një ekip i ngjashëm me Partizanin mund t’i bëjë vetëm brenda një viti.
Sulejmani ka qenë i pari që është thirrur nga tekniku Dalipi, i cili i ka tërhequr vëmendjen për të zbatuar urdhrat e tij në stërvitje.
Më pas ka vijuar që të ‘fërkohet’ dhe me Renaldo Kalarin dhe Lorenc Trashin. Por, këta dy të fundit kanë përfunduar jashtë stërvitjes.
Megjithatë, nuk ka pasur zënka apo debate si disa ditë më parë kur çdo gjë ishte gati të degjeneronte në dhunë.
Lojtarët janë detyruar që të dalin jashtë fushës për të vijuar me ushtrime individuale, kjo në shenjë dënimi për atë që ndodhi në fushë.
Ndoshta, Dalipi ka dashur që të tregohet i rreptë para ‘praktikantëve’ si: Ervin Skela, Elvin Beqiri apo Eqerem Memushaj dhe të tjerë që kanë qenë të pranishëm për të ndjekur një orë stërvitjeje në fushë për shkak se po bëjnë kursin UEFA Pro në sektorin e edukimit në FSHF. /EDS/
