Floyd Mayweather dhe Conor McGregor boksuan në Las Vegas më 26 gusht, në atë që hyri në histori si ndeshja e milionave. Ky ishte ballafaqimi më i madh në vitin 2017. Ky vit u karakterizua me ballafaqime të shumta në sporte të ndryshme, por vetëm njëri prej tyre mori vëmendjen. Floyd Mayweather dhe Conor McGregor u ndeshën në atë që u konsiderua si ndeshja e shekullit.
Boksieri amerikan triumfoi në kete ndeshje kundër McGregorit, i cili kishte ardhur nga Artet e Përziera Marciale për t’u ndeshur për herë të parë në boksin profesionist. Mayweather, i cili konsiderohet si boksieri më i mirë në historinë e këtij sporti, e arriti fitoren e 50-të në karrierën e tij. Amerikani e arriti fitoren me nokaut teknik në rundin e dhjetë. McGregor e kishte filluar mirë këtë ndeshje, por mospërvoja në boksin profesionist bëri që triumfi në fund t’i takonte Mayweatherit, i cili pas këtij takimi njoftoi pensionimin e tij nga boksi.
Meçi 400-milionësh
Nga shumëkush sfida mes Mayweatherit dhe McGregorit është quajtur si ndeshja e milionave. Ishte raportuar se Mayweather kishte arkëtuar rreth 300 milionë dollarë nga ky meç, kurse McGregor rreth 100 milionë. Mayweather kishte deklaruar se ky do të jetë takimi i fundit për të. “Ky pa dyshim që është dueli i fundit. Sonte zgjodha partnerin e duhur. Jam larguar më herët nga sporti. Nuk kam pasur nevojë që të kthehem. Nëse vjen një mundësi për të fituar 300 apo 350 milionë dollarë për 36 minuta, atëherë pse ta refuzoj? Por ky është i fundit. Më besoni. Kam pasur një karrierë të madhe. Nuk mund të ankohem për asgjë. Nuk do të më shihni më në ring. Çdokush që dëshiron të më thërrasë, le ta harrojë”, ishte shprehur Mayweather pas duelit. Ndërkohë McGregor kishte thurur lavde për amerikanin pas takimit. “Ishte një nder që të ndaja ringun me Floydin. Kam arritur në pesha të larta dhe do të vazhdoj të synoj edhe më lart. Ishte një duel i mirë, mendova se isha duke e mposhtur në rundet e para, po ai është shumë i kompletuar. Ai e ndërroi planin tri herë. Këtë mund ta bëjë vetëm një kampion i vërtetë. Kjo me të vërtetë meriton shumë respekt. Do të doja të shihja se çfarë do të ndodhte pas rundit të dhjetë. Por duhet t’ia heqësh kapelën Floydit. Ai është i kompletuar. Nuk është shumë i fuqishëm, por i kompletuar”, kishte thënë ai.
