Kosova do të luaj një ndeshje shumë të rëndësishme teksa më datë tetë tetor do të udhëtoj drejt Shkupit për t’u përballur me Maqedoninë e Veriut për gjysmëfinalen e Kupës së Kombeve.
Dyshimet e Dardanëve ishin rreth Vedat Muriqit i cili sapo ka kaluar koronavirusin dhe vjen nga një dëmtim, ndërkohë edhe Milot Rashica ka vuajtur gjithashtu një dëmtim. Megjithatë, ndihmëstrajneri i Kosovës, Muharrem Sahit për “Zëri.info”, ka besimin se të dy futbollistët do të jenë pjesë e përfaqësueses.
“Gjasat që ata të jenë pjesë e ekipit janë shumë të mëdha. Vedati do të ftohet në ekip, sigurisht nëse gjërat nuk ndryshojnë deri me 5 tetor. Miloti pas lëndimit me Moldavinë ka pasur stërvitje me pak, pra kishte kufizime. Mbetet të shihet nëse do të jetë në gjendje qindpërqind por edhe tek ai besojmë. Pra nëse nuk ndryshojnë gjërat këtë javë ai do të jetë pjesë e jona.
Ne atje shkojmë për fitore dhe nuk ka alternativë tjetër. Me ata lojtarë që kemi në dispozicion me ata shkojmë për të dhënë gjithçka për ta realizuar këtë ëndrrën të madhe që po e përjetojmë. Ne tash nuk do t’i vajtojmë lojtarët që nuk do t’i kemi.
Me ata që do t’i kemi shkojmë me të gjitha forcat, sigurisht aq më mirë do të ishte nëse jemi të kompletuar pasi gjasat atëherë do të jenë shumë më të mëdha për kualifikim”, u shpreh Sahiti. /VipSport/
