Ndriçim Shtubina priste fitoren, e megjithatë në fund mendon se edhe një pikë vlen. Gjatë deklaratës së dhënë për “Panorama Sport” pas ndeshjes se djeshme ndaj Teutes, ai thekson se i “ndëshkoi” mungesa e eksperiencës.
“Jam shumë i lumtur që shënova në këtë ndeshje. E lexova aksionin dhe nuk mendova dy herë për ta goditur. Ashtu siç shkuan gjërat, mendoj se mund të dilnim me tri pikë nga Durrësi, por ky është futbolli.
Kemi lojtarë të rinj dhe na mungoi ndoshta eksperienca për të mbrojtur avantazhin deri në fund, por gjithsesi ndaj një kundërshtari si Teuta mendoj se dhe një pikë vlen”, u shpreh fillimisht shkodrani.
I pyetur për ndryshimin mes dy pjesëve, ai tha: “Është ndeshja e dytë që ulim ritmin dhe kjo duhet të shmanget. Në ekip kemi djem të rinj që duhet të kenë më shumë besim në vetvete, pasi kanë akoma për të dhënë. Kjo gjë duhet të ndryshojë sepse nuk mjafton vetëm një pjesë për të fituar”.
