Në ndeshjet e fundit të Cungut në krye të Vllaznisë, preferoi në vijën e parë të sulmit vlonjatin Andi Ribaj. Ndërkohë me ardhjen e trajnerit të ri Ernest Gjoka, ai vendosi që t’i besonte repartin ofensiv Arlind Kalajës. Ky lojtar padyshim që u mundua të bënte maksimumin në ndeshjen ndaj Partizanit, por u pa qartë se e kishte të vështirë të përshtatej në atë rol jo të zakonshëm për të.
Në këto kushte, stafi teknik i kuqebluve mesa duket ka ndër mend të ndryshojë sërish në repartin e sulmit. Nesër ndaj Kukësit, nga minuta e parë pritet të jetë në sulm ganezi Charles Atsina.
Ky i fundit kishte munguar prej disa javësh ngaqë ka qenë i dëmtuar por javën e fundit është stërvitur normalisht me grupin dhe për këtë arsye, trajneri Gjoka ka vendosur ta nisë lojën me të nga minuta e parë. Ai në fakt e paralajmëroi në konferencën e sotme për shtyp kur deklaroi se mund të ketë një ndryshim në formacion ndërkohë që të tjerët do të jenë po ata futbollistë të cilët luajtën edhe ndaj Partizanit.
© shkodrasport.com
