Java e gjashtë e Superligës rezervoi jo pak surpriza, teksa sfida më spektakolare ishte derbi mes Tiranës dhe Partizanit, që përfundoi me triumfin e këtyre të fundit. Por edhe ndeshjet e tjera, të luajtura këtë të shtunë, ishin emocionuese teksa në sy bie humbja e parë e Skënderbeut në kampionat, që u mund në Durrës nga Teuta. Kështu korçarët bien në renditje vendin e tretë në renditje, pasi vendin e parë e mbajnë Kukësi dhe Partizani me pikë të barabarta, 13 për çdo ekip.
Java e shtatë e Kategorisë Superiore do të rikthehet shumë shpejt, pasi në mesin e javës së ardhshme, të mërkurën më 3 dhe të enjten më 4 tetor, do të luhen të gjitha sfidat e rradhës në kampionat. Këtë herë ndeshjet që do të zhvillohen në mesjavë, do të shoqërohen edhe me disa ndryshime.
Nëse deri më tani ishim mësuar të shihnim Superligën të zhvillohej në orën 15:45, 18:45 apo 19:45, ndeshjet e javës së shtatët do të luhen më afër mesditës. Kështu, oraret e reja do të jenë në 13:45 dhe 16:45, ndërsa sfida mes Skënderbeut dhe Kukësit, që do të luhet të enjten më 4 tetor, do të zhvillohet më 17:45.
Orari i zhvillimit të ndeshjeve është i vemti ndryshim i parashikuar të paktën deri tani, për javën e shtatë të Superligës. Ndërkohë që kalendari ka rezervuar edhe për këtë javë sfida të bukura dhe surprizuese.
Kështu të mërkurën, ku do të luhen katër sfida, në fushën e lojës do të zbresin Luftëtari kundër Kamzës, me të dyja skuadrat që humbën këtë të shtunë në Superligë. Partizani kundër Teutës, me të dyja skuadrat që e mbyllën me fitore javën e gjashtë.
Kastrioti gjen Tiranën si kundërshtar në sfidën e rradhës, të dyja ekipet humbën ndeshjet paraardhëse. Ndërsa Laçi do të përballet me Flamurtarin. Sakaq të enjten më 4 tetor do të luhet dhe sfida e fundit e javës së shtatë të Superligës, ajo mes Skënderbeut dhe Kukësit.
Java e shtatë e Superligës:
Ndeshjet Data Ora Qyteti ku luhet
Luftëtari-Kamza 03/10/2018 13:45 Gjirokastër
Partizani-Teuta 03/10/2018 16:45 Tiranë
Kastrioti-Tirana 03/10/2018 13:45 Fushë Krujë
Laçi-Flamurtari 03/10/2018 13:45 Laç
Skënderbeu-Kukësi 04/10/2018 17:45 Korçë
