Elis Bakaj është një ndër ta paktët futbollistë shqiptarë që luan akoma, pas ndërprerjes së shumicës së kampionateve në të gjithë botën për shkak të rrezikut të përhapjes së Covid-19. Sulmuesi aktivizohet në Bjellorusi dhe organizatorët atje akoma nuk kanë vendosur për të ndaluar së luajturi, por e bëjnë këtë në stadiume pa tifozë.
Në lidhje me këtë vendim të Federatës Bjelloruse për mediet vendase ka folur ish-sulmuesi i Partizanit e Tiranës, Bakaj. Ai shprehet se situata atje nuk është aq e rëndë dhe ndoshta njerëzit kanë nevojë që të shohin pak futboll. Bakaj shton se atij nuk i mbetet gjë tjetër veçse të respektojë vendimet e klubit, me të cilin ka një kontratë.
“Nëse situata do të ishte si Italia apo si Evropa sigurisht që duhet të ndalohet futbolli. Por këtu deri tani nuk është dhe aq e rrezikshme. Për mua vendimi për të luajtur është normal sepse tani njerëzit kanë nevojë për pozitivitet duhet të shohin disa aktivitete. Jo gjithmonë duhet menduar për koronavirusin sepse të bën edhe keq për stresin e për çdo gjë. Në Bjellorusi gjithçka është normale. Jeta është normale jo si pjesa tjetër e Europës.
Unë kam një kontratë me një ekip futbolli, kështu që duhet ta respektoj këtë kontratë. Kur ke një kontratë do të shkosh në stërvitje çdo herë, duhet të luash gjithmonë. Nëse ke ndonjë problem me këtë atëherë mbaro kontratën dhe shko në shtëpi. Kështu është në të gjithë botën. Nëse skuadra juaj dëshiron të luajë dhe ti jo, atëherë ky është një problem i madh.
Unë tani dua të mendoj për gjëra pozitive. E di që është e vështirë të luash futboll në këtë moment, por çfarë duhet të bëj? Unë jam profesionist dhe kam një kontratë të gjatë. E di që është e vështirë, por çfarë të bëj? Asgjë”, tregon Bakaj. /vipsport/
