Thuhet: paràtë nuk janë gjithçka. Por në futboll, kjo nuk vlen, sepse janë paràtë që sjellin lumturinë.
Ose të paktën sjellin titullin kampion. Eshtë kjo që del nga një studim i pesë kampionateve më të forta të Europës, të dominuara nga klubet me buxhetet më të mëdha, e thënë ndryshe nga klubet me vlerën më të madhe të futbollistëve në ekipet e tyre.
Manchester City, Barcelona, Bayern Munich dhe Paris SG, më të pasurat e Anglisë, Spanjës, Gjermanisë dhe Francës kanë fituar kampionatet përkatëse dhe së shpejti këtij grupi do t’i bashkohet Juventus, ekipi më i pasur në Itali, që do të shpallet kampion për herë të shtatë radhazi.
Ka të drejtë Sarri, trajneri i Napoli, kur flet se janë paràtë që sjellin trofetë. Nuk ka dyshim, por le ta konfirmojmë me shifra…
Barcelona është ekipi që ka futbollistët më të shtrenjtë në futbollin e sotëm, për një total prej 1 miliardë eurosh. Pra, të gjithë bashkë lojtarët katalanas kushtojnë 1 miliardë euro dhe në fund të prillit u shpallën kampionë të Spanjës.
Në Premier League, Manchester City, futbollistët e të cilët kushtojnë 856,5 milionë euro, është kampion i Anglisë dhe e fitoi kampionatin me 19 pikë më shumë se United.
Bayern Munich, përbërja e të cilit kushton 779 milionë euro, ka fituar titullin e gjashtë radhazi në Bundesliga, që më 7 prill, me 24 pikë avantazh ndaj Borussia Dortmund, ndërsa titulli në Ligue 1 u fitua nga Paris St Germain, që ka një vlerë 775,5 milionë euro, dyfishin e Monaco me 348.6 milionë euro.
Në Serie A vlera e futbollistëve të Juventus është 616,3 milionë euro, më shumë se çdo ekip tjetër.
Pastaj dihet, vlera në merkato vihet në bazë të fitoreve, sa më shumë fitohet aq më shumë vlera e lojtarëve rritet dhe arkat mbushen.
Në të vërtetë paràtë dhe titulli udhëtojnë në dy shina paralele. Diferenca mes të pasurve dhe më pak të pasurve ka tendencën të rritet në vitet e ardhshme./telesport/
