Shkodranët e kanë me Gjoken.
Ish trajneri i kuqebluve është vënë në shënjëstër të kritikave i akuzuar si përgjegjësi kryesor për rënien e Vllaznisë nga kategoria, madje deri aty sa kërkojnë ta shpallin “Non grata” për qytetin verior.
Thonë se çudia më e madhe në Shkodër zgjat deri në tre ditë. Por, me sa duket kur bëhet fjalë për futbollin këtu nuk ka fare limit.
Aq më tepër që në qëndër të këtij shqetësimi kaq të madh publik që ka përfshirë, jo vetem qytetin verior, por edhe më gjërë, është Vllaznia e Shkodrës.
Klubi sportiv që vitin e ardhshëm, dhe pikërisht me 16 shkurt 2019 do të festojë 100 vjetorin e lindjes si i pari klub i këtij lloji në Shqipëri, Vllazninë e “djepit të futbollit shqiptar” do ta ketë në kategorinë e parë.
Është kjo arsyeja që Shkodra dhe shkodranët vazhdojnë të “zien” fort gjatë këtyre ditëve për gjendjen katostrofike që ka pllakosur futbollin shkodran.
Ish tekniku në fokus.
Për shkodranët, rënia e Vllaznisë në kategorinë e parë ngarkon me përgjegjësi të gjithë ato që ishin të angazhuar me skuadren kuqeblu në sezonin futbollistik 2017-2018. Futbollistë, staf teknik, drejtues të klubit Vllaznia, Bordi Mbikqyrës kuqeblu dhe deri tek maja më e lartë e presidences që në rastin konkret është kryebashkiakja Ademi kanë kusuret e tyre në këtë drejtim.
Por, gjithësesi, ai që është vënë më shumë në vemendje të opinionit sportiv shkodran është numri një i pankines kuqeblu, ish trajneri Ernest Gjoka.
Ardhja e tij në krye të Vllaznisë aty nga mesi i fazës së dytë të kampionatit u prit me optimizen nga të gjithë shkodranët me idenë se prania e tij do të ndikonte për mirë në përformancen e rezultateve të Vllaznisë në fushën e lojës.
Një gjë të tillë e përforconte edhe qëndrimi i vete trajnerit Gjoka, i cili sidomos me kompetencat e plota që mori nga kryebashkiakja-presidente Voltana Ademi në periudhën e ndërrimit të viteve, nuk nguroi të garantonte shkodranët se tashmë Vllaznia ka potencialet e saj, jo vetem për të mbijetuar por për të parë edhe lart në renditje.
Por, rrëshqitja e pakuptimtë e Vllaznisë në fazen e katërt dhe përfundimi në një kategori më poshtë e shndërroi ish teknikun Ernest Gjoka në njeriun më të kritikuar në Shkodër.
Pse jo, në raste të veçanta edhe jo pak të padëshiruar për mjedisin sportiv shkodran, sidomos me veprimin e ndërmarrë të braktisjes së skuadrës dy javë përpara përfundimit të kampionatit.
Në vijim të analizave dhe diskutimeve rreth dështimit të Vllaznisë në këtë kampionat, sidomos që nga e mërkura në mbrëmje kur Vllaznia zyrtarisht figuronte në kategori të parë, emri i ish trajnerit Gjoka është ndër më të lakuarit sa i përket përgjegjësive të rënies së Vllaznisë nga kategoria.
Madje, i shoqëruar edhe me akuza nga më të rëndat, deri edhe në absurditet, ku përpos paaftësisë së cilësisë së trajnimit, në opinionet e përcjella në mediat lokale dhe rrjetet sociale duke e paragjykuar edhe si qëllimtë dështimin e tij.
Interesant është fakti se rezervat për drejtimin e tij në krye të Vllaznisë vijnë edhe nga ato që bëjnë pjesë në administraten e Bashkisë Shkodër, që në këtë rast nuk marrin përsipër të flasin në emer të institucionit, por theksojnë se gjithçka shkruajnë dhe komnentojnë e kanë në aspektin personal si qytetar dhe tifozë të Vllaznisë që i dhemb shpirti për skuadren e tyre të zemres se ku është katandisur, larg imazhit dhe lavdisë së këtij emri të madh të futbollit shqiptar.
Ernest Gjoka, “Non grata” në Shkodër.
Zemërimi me ish trajnerin e Vllaznisë Ernest Gjoka, të cilin shkodranët e konsiderojnë si përgjegjësin kryesor për dështimin e Vllaznisë shkon deri aty, sa nga individë të caktuar kërkojnë ta shpallin atë si person të padëshiruar për qytetin verior.
Një deklaratë e tillë vjen nga një ish futbollist i njohur i Vllaznisë së viteve 80-të, Fatmir Lugji, sot një nga intelektualet e spikatur të qytetit verior, psikolog në profesion i atashuar edhe pranë strukturave të Bashkimit Europian për rajonin e Shkodrës.
Lugji, që ndër të tjera spikat edhe në rolin e opinionistit pranë studiove televizive të qytetit të Shkodrës duke folur për çështjen në fjalë, flet edhe si specialist futbolli, por edhe si qytetar shkodran dhe si tifos i Vllaznisë.
Sipas tij, ndërsa nuk kursen kritika jo të vogla edhe për drejtuesit dhe menaxhimin e klubit, stafi teknik dhe kryesisht trajneri i parë, Ernest Gjoka ka përgjegjësinë më të madhe dhe direkte për këtë të keqe që kapi Vllazninë në këtë fundkampionati.
“Pika më e dobët ka qënë stafi teknik dhe sidomos trajneri që për mua ai është një person i cili ka ardhë tek Vllaznia, ka mashtruar, ka bërë sikur din, është një profesionist sipas thënieve të FB-kut dhe nuk ka bërë asgjë”, shprehet ish futbollisti Fatmir Lugji në një nga studio lokale televizive të qytetit verior duke këmbëngulur në të tijen se “stafi teknik ka përgjegjësitë e veta.”
E mandej, vjen edhe deklarata “bombë” e ish futbollistit kuqeblu, Lugji, që sipas tij, për të gjitha ato dëme që i ka bërë skuadrës kuqeblu, ish trajneri Gjoka të shpallet si person i padëshiruar për stadiumin e Shkodrës.
“Unë mendoj që atë tip trajnerit, Shkodra ta bëjë “Non Grata” që mos ta lejojë të futet më në stadiumin “Loro Boriçi”. Edhe në qoftëse merr një ekip tjetër dhe vjen të luajë me Vllaznisë, ai nuk duhet të hyjë në stadium, sepse e ka dhunu, shantazu, e ka mashtru popullin shkodran, bashkinë e Shkodrës dhe të gjithë tifozërinë.”, shprehet i indinjuar Lugji.
Duke dashur të argumentojë atë që ai mendon për këtë trajner, Lugji shton:”Frikacak. Pse duhet të largohej ai me dy ndeshje pa përfunduar. Ai duhet të qëndronte këtu.
Një ditë më parë kishte shkruar në FB për lojtarët: “unë kam besim tek ju, unë jam timonieri, etj, etj, dhe në momentin më të keq, pas 90-të minutash lojë ai iken dhe braktise skuadren. Trajneri është baza e skuadres.”/Endri Çinari-newsport/
