Të mërkurën e ardhshme në Shkodër është planifikuar të luhet ndeshja e Kupës së Shqipërisë në mes Vllaznisë dhe Kamzës. Kjo ndeshje ka qenë në dyshim deri para pak ditësh sepse stadiumi “Loro Boriçi” ka qenë i mbuluar nga bora.
Kjo e fundit kishte zbardhuar gjithë hapësirën e tij ndërkohë që në fushë shkoi deri në 21 centimetra. Por prej ditës së djeshme në Shkodër kanë nisur reshjet e shiur të cilat kuptohet që kanë bërë të mundur fillimin e shkrirjes së borës.
Por në fakt, gjërat nuk kanë shkuar dhe aq mirë deri tani dhe jo e gjithë bora është shkrirë. Fotot e këtij shkrimi i takojnë pasdites së sotme dhe ato tregojnë qartë se mbi fushën e stadiumit “Loro Boriçi” janë ende edhe 10 centimetra borë.
Kjo do të thotë se të paktën deri më sot sërish zhvillimi i kësaj ndeshje është ende në dyshim. Shanset janë që deri të mërkurën bora të shkrijë tërësisht por edhe nëse ndodh kështu, specialistët këshillojnë që të mërkurën të mos luhet në “Loro Boriçi” sepse lagështira është e madhe dhe do të ndikonte për keq në tapetin e tij. Se çfarë do të ndodhë, duhet pritur edhe pak ditë.
© shkodrasport.com
