Finalja e mbijetesës ndërmjet Teutës dhe Vllaznisë do të luhet nesër prej orës 19:00, në stadiumin “Niko Dovana”.
Ky takim është shumë i rëndësishëm, pasi një fitore e shkodranëve do t’i shkëpuste 6 pikë nga Teuta duke i lënë shumë mbrapa në luftën për mbijetesë, ndërsa një fitore e durrsakëve do të bënte që gara të jetë shumë e fortë, pasi do të barazoheshin me pikë të dy skuadrat.
Lufta është shumë e ashpër dhe skuadrat kapen pas çdo detaji në këtë fazë të kampionatit.
Në Shkodër kanë bërë menjëherë llogaritë para ndeshjes, duke qenë se pjesa kryesore e gjyqtarëve janë caktuar për sfidat e sotme, atëherë kanë mbetur fare pak emra në dispozicion.
Kandidati kryesor që mund të gjykojë sfidën është Enea Jorgji. Ky i fundit është një emër i padëshiruar në Shkodër, pasi është i shpallur “non grata”.
Emri i tij në këtë sfidë është krejtësisht i padëshiruar, pasi Jorgji u shpall “non grata” nga skuadra kuqeblu pikërisht në një sfidë kundër Teutës.
Në sfidën e luajtur për Kupën e Shqipërisë që u fitua nga durrsakët me rezultatin 2-0 dhe ekipi shkodran u eliminua në ë çerekfinale në vitin 2017.
““Klubi i Futbollit Vllaznia është I detyruar të dalë me këtë deklaratë për shtyp pas ndeshjes së sotme Teuta- Vllaznia, e vlefshme për turin çerekfinal të Kupës së Shqipërisë, nisur nga arbitrimi i turpshëm i kryesorit Enea Jorgji.
Themi i turpshëm sepse ky arbitër vendosi jo vetëm fatin e kësaj ndeshje por edhe atë të kualifikimit. Natyrisht që për ne nuk ishte ndonjë gjë e re me këtë arbitër sepse sidomos në këtë sezon na ka dëmtuar sistematikisht.
Do ja dërgojmë pamjet edhe FSHF bashkë me kërkesën që ky arbitër të mos e drejtojë më Vllaznisë sepse për klubin tonë ai tani e tutje është “non grata”.
KF Vllaznia nuk do ta lërë me kaq çështjen e këtij arbitri.
Pamjet filmike të kësaj ndeshje, por edhe ato të ndeshjeve të mëparshme në të cilat ka ndëshkuar Vllazninë, do t’ia dërgojmë FIFA-s dhe UEFA-s dhe do kërkojmë deri në fund ndëshkimin e tij për t’I hequr stemën që ai mban.
Futbolli shqiptar nuk ka nevojë për Enea Jorgjin dhe arbitrimet e tij skandaloze. Për këto arsye, jemi të vendosur t’I shkojmë deri në fund kësaj çështje”, – shkruhej në një pjesë të deklaratës së asaj kohe. /EDS/
