“Super Deporte” nxjerr të tjera detaje për transferimin e mundshëm të Armando Sadikut te Levante në La Liga. Në Spanjë e kanë bërë tashmë të sigurt kalimin e sulmuesit shqiptar drejt ekipit të Levante-s, e cila së shpejti do të sigurojë shërbimet e 26-vjeçarit.
Sadiku qëndroi një javë në Spanjë, pikërisht në Benidorm, një orë e gjysmë larg Valencia-s, ku zhvilloi fazën përgatitore me Legia-n e Varshavës. Për fat të mirë, sulmuesi kuqezi shënoi edhe në miqësoren kundër Silkeborg, fituar 2-0 nga Legia, vetëm pak orë pasi Levante ishte përballur me Deportivo de La Coruna-n për kampionat.
Sipas “Super Deporte”, Sadiku do të firmosë për tre vite me Levante-n, ndërsa klubi spanjoll do të paguajë 1 milion euro për kartonin e tij.Janë disa elementë që kanë bindur Levante-n për të afruar Sadikun në këtë merkato dimri.
Së pari, janë pikërisht vlerat e padiskutuara të tij si një futbollist tashmë i afirmuar në Europë, aftësia për të luajtur edhe si sulmues i dytë dhe njohja e gjuhës spanjolle.
Sadiku flet 6 gjuhë të huaja, mes tyre edhe spanjisht.Ndërkohë që lajmi për kalimin e sulmuesit elbasanas te Levante është konfirmuar në Twitter edhe nga gazetari i “Radio Valencia”, Jose Manuel Aleman.
Armando Sadiku u transferua në merkaton e verës së 2017-ës te Legia e Varshavës për 750 mijë euro dhe gjatë këtij sezoni, ndonëse nuk ka gjetur hapësirat e nevojshme në formacion, ka arritur të shënojë 7 gola.
Megjithatë, zërat e merkatos që e çojnë Sadikun te Levante nuk kanë ndikuar te sulmuesi shqiptar, i cili në një intervistë për mediat polake ka folur për konkurrencën me sulmuesin Eduardo da Silva, duke u shprehur se dëshiron të luajë së bashku me të në fushën e lojës.
“Eduardo është një djalë shumë i mirë. Kam biseduar me të, disa herë në gjuhën spanjolle, por edhe në atë portugeze. Ka shumë cilësi si futbollist. Dua të luaj me të, sepse është një lojtar me të vërtetë i shkëlqyer.
Sa më shumë futbollistë të mirë të ketë në skuadër, aq më e lartë është cilësia dhe konkurrenca, çka është pozitive. Këtë sezon dëshiroj të fitoj titullin me Legia-n e Varshavës. Dua të shënoj golin që do t’i jepte Legia-s, trofeun e ëndërruar”, deklaroi Armando Sadiku për median polake “Pilkanozna.pl”./vipsport/
