Gjithçka nisi si një shaka në Lucernë. Shqiponja dykrenare që këtë verë trazoi kombëtaren e Zvicrës, u bë frymëzim për një fabrikë birre, që postoi online recetën e “Doppelradler”.
Por bashkë me recetën shfaqej edhe një foto, që tregonte një shishe me etiketën dhe dy duar qartësisht të dukshme në formën e shqiponjës dykrenare të flamurit shqiptar (në gjermanisht “Doppeladler”).
Reagimet pozitive ndaj këtij postimi e shtynë kompaninë zvicerane ta nxirrte në shitje këtë birrë, që u shit me shpejtësi të madhe, siç shpjegon njëri nga drejtuesit e fabrikës:
“100 kolitë që prodhuam në fillim u rezervuan shumë shpejt, – tregon drejtori David Shurtenberger. – Shumë njerëz erdhën ta kërkonin këtë birrë direkt në fabrikë, por u zhgënjyen, sepse nuk kishim”.
Duke parë këtë interesim, fabrika arriti të shesë trefishin e prodhimit të saj vjetor. “Kemi marrë kërkesa për këtë birrë nga Prishtina dhe Tirana”, – shpjegon më tej drejtori i fabrikës. Fabrika ka marrë më shumë se 600 e-mail-e përgëzimi për këtë birrë, por ka pasur edhe probleme:
“Në një rast na kanë kërcënuar se do të na dhunonin dhe kjo ishte një situatë e keqe”, – vazhdon Shurtenberger, i cili lajmëroi policinë për të mbrojtur punëtorët e tij në fabrikë. Forcat e policisë ishin të pranishme, kur nisi shitja e birrës.
Edhe tani fabrika vazhdon të marrë porosi për birrën “Doppelradler”, birrën me shqiponjën dykrenare, por nuk ka më, sepse prodhuesi nuk dëshiron të provokojë askënd, duke shitur birrë për një grup të caktuar njerëzish. Megjithatë, kjo fabrikë do të vazhdojë të hedhë në treg birra të veçanta dhe me etiketa humoristike. / Vipsport/
