Nejmar ngjitet një shkallë në podiumin e golashënuesve historikë të Brazilit. 28-vjeçari mëngjesin e sotëm udhëhoqi “Seleçao” drejt triumfit të dytë radhazi në Kualifikueset e Botërorit 2022, teksa viktima e radhës ishte Peruja. Kjo e fundit luante në shtëpi dhe bëri maksimumin për t’ia bërë të vështirë Nejmar me shokë.
Deri në minutat e fundit ia arriti qëllimit. Peruanët shënuan të parët që në minutën e gjashtë me Andre Karijon. Brazili reagoi pas 22 minutash dhe gjeti rrjetën me një penallti të shndërruar në gol nga Nejmar.
Peruja nuk u dorëzua dhe shënoi sërish me Renato Tapia pas një ore lojë. Brazili vendosi klasin e sulmit të tij në punë dhe gjeti barazimin me yllin e Everton, Riçarlison në të 64-tën.
Barazimi nuk mjaftonte për pesë herë kampionët e Botës dhe vazhduan të shtynin fort përpara për të arritur triumfin. Një tjetër penallti u vjen në ndihmë për të gjetur avantazhin e parë në këtë ndeshje dhe në gol e kthen Nejmar në minutën e 83-të.
Ylli i PSG nuk do mjaftohej me kaq, por do shënonte edhe golin e tretë të tij personal në këtë ndeshje dhe të katërtin me Brazilin, duke fiksuar shifrat në 2-4.
Me këtë trigolësh Nejmar hyn në historinë e Brazilit, duke qenë golashënuesi i dytë i kësaj kombëtareje. Në këtë renditje ka parakaluar Ronaldo Fenomenin, duke hyrë zyrtarisht në listën e legjendave të mëdha, megjithëse ende i mungon një Kupë Bote.
Fenomeni ka shënuar 62 gola me kombëtaren, ndërsa Nejamr ka tundur rrjetën 64 herë. Ylli i Brazilit tashmë është në “gjueti” të rekordit të legjendës Pele, i cili numëron 77 gola të shënuar. /vipsport/
