Boksieri i njohur shkodran Nelson Hysa “e mban fjalën”. Kishte deklaruar pak muaj më parë se objektivi i tij ishte të renditurit në mes 30 boksierëve më të mirë të Botës në peshën e rëndë dhe e ka arritur atë.
Renditja e fundit e Federatës IBF, një nga më të rëndësishmet e boksit botërore, e ka vendosur Nelson Hysën në vendin e 28-të. Një pozicionim i shkëlqyer i kampionit shqiptar që kësisoj vazhdon të mos ndalet në synimet e tij.
Dhe të mos harrojmë se kjo renditje kryesohet nga një emër i madh i boksit si Anthony Joshua, për të vazhduar me kinezin Zhilei Zhang, kamerunasin Francis Ngannou, kanadezin Martin Bakole, hollandezin Josepf Parker e kështu me rradhë dhe kur mbërrin tek vendi i 28-të do të ndalesh tek NELSON HYSA.
Dhe të mos harrojmë se kampioni ynë ka vetëm 19 muaj që i ka hyrë boksit profesionist dhe të arrish deri në këto nivele, është diçka e paimagjinueshme. Hysa ka arritur të zhvillojë deri tani 14 ndeshje të cilat i ka fituar të gjitha, madje 12 prej tyre me KO.
Ai ndërkohë ka nisur stërvitjet për një tjetër vit të paharrueshëm sepse synimet e tij janë edhe më të mëdha dhe përderisa ka mbërritur deri tek vendi i 28-të në Botë, pse jo të mos synojë ngjitjen edhe më lart dhe futjen në “Top 10”./SHKODRA-SPORT.COM/
