Dita e martë do të jetë shumë e rëndësishme për të ardhmen e Vllaznisë.
Data 26 qershor është caktuar për mbledhjen e Asamblesë së Përgjitshme të
Klubit të Futbollit Vllaznia dhe pas përfundimit të saj, pritet që të ketë
vendime të rëndësishme për të ardhmen e këtij klubi.
Në fakt, në rendin e ditës është vetëm një pikë, ajo e miratimit të pasqyrave financiare të vitit 2017, gjë që është e detyrueshme sipas ligjit.
Por, përveç kësaj pike është e qartë se do të ketë edhe shumë gjëra të tjera për t’u diskutuar dhe miratuar.
Vetë kryebashkiakja Ademi e bëri të qartë edhe në mbledhjen e fundit të Këshillit Bashkiak se të gjitha pyetjet që këshilltarët do kenë në lidhje me Vllazninë, t’i depozitojnë në Sekretari dhe ato do të marrin përgjigje në mbledhjen e Asamblesë.
Çka do të thotë se kjo mbledhje do të ketë shumë diskutime dhe debate.
E rëndësishme është që prej saj të dilet me vendime konkrete të cilat do ndihmojnë pastaj në ecurinë e mëtejshme të Vllaznisë sepse për momentin çdo gjë duket e bllokuar.
Dorëheqja e paraqitur nga administratori Astrit Gjyrezi pritet të miratohet nga Këshilli Mbikëqyrës dhe njëkohësisht të emërohet administratori i ri.
Por para se të ndodhë kjo, duhet sqaruar pozicioni i Këshillit aktual Mbikëqyrës.
Ka patur aludime për dorëheqje të tij por kjo nuk ka ndodhur.
Po ashtu, ka patur aludime për krijimin e një Këshilli të ri, madje në media dolën edhe emrat e propozuar.
Ajo çfarë diskutohet është se do të ketë një miksim të Këshillit aktual me emrat e propozuar, duke bërë që të shtohet numri i tyre.
E rëndësishme është që kjo të marrë zgjidhje brenda mbledhjes së nesërme sepse nëse kjo procedurë zgjat, do të jetë në dëm të skuadrës.
Vllaznia e re duhet të nisë sa më parë punë sepse pjesmarrja në kategorinë e parë nuk do të jetë aq e lehtë sa mendohet.
Prandaj dhe drejtuesit duhet të shpejtojnë për të hedhur piketat e ndërtimit të skuadrës së ardhshme.
© shkodrasport.com
