Pavarësisht momenteve jo të mira që po kalon ekipi i parë i Vllaznisë, tek Akademia e saj gjërat duken se shkojnë ashtu si duhet.
Madje, brenda muajit prill mësohet se dy futbollistë të ekipit U-19 do të udhëtojnë drejt Kroacisë për një provë.
Dhe një provë jo dosido por tek ekipi i mirënjohur i Dinamos së Zagrebit.
Lajmin e ka bërë të ditur për “Shkodra Sport” përgjegjësi teknik i kësaj Akademie Alban Neziri i cili është shprehur:
“Dy futbollistë të Akademisë tonë gjatë këtij muaji do jenë në Kroaci në provë tek Dinamo Zagreb dhe ky besoj se është një lajm i mirë sepse ata do të kenë mundësinë të tregojnë vlerat e tyre të vërteta.
Kemi të bëjmë me një klub shumë të njohur dhe nëse ata bindin, nuk përjashtohet mundësia që t’u ofrohete dhe kontratë atje”.
Ai nuk ka dashur të zbulojë emrat e këtyre dy futbollistëve që do jenë në këtë provë megjithatë shumë shpejt një gjë e tillë do të bëhet e ditur.
© shkodrasport.com
