Kur përmend mbiemrin “Smajlaj” sigurisht që të gjithëve u shkon menjëherë mendja tek “Izmiri”, Kampioni i Europës në atletikë. Por në fakt sot do të shkruajmë dhe flasim për një tjetër pjestar të kësaj familje.
Dhe ajo çka është më interesantja, për një tjetër KAMPION. Ai është Brendi. 18 vjeçari dy ditë më parë është shpallur kampion kombëtar me të rriturit në sportin e boksit.
Ka fituar fillimisht ndaj Omer Brahjes në gjysmëfinale dhe më pas ndaj Emanuel Kaçajt në finale. Të mos harrojmë se ai konkurron në peshën super të rëndë, +91 kilogramë.
Dhe në fakt, të shikoje Brendi Smajlin në ring ishte vërtetë një kënaqësi. Përballë syve të shfaqej një “gjigand” i cili ishte i tillë edhe në duel përballë kundërshtarëve.
Interesant është fakti se sportin e ka filluar vetëm një vit më parë, kur ishte 17 vjeç. Nuk dihet se kush ia mbushi mendjen për t’u marrë me sport megjithatë zgjedhja e bërë duket perfekte.
Stërvitet nën drejtimin e një mjeshtri si Besnik Gjetaj, prej të cilit ka se çfarë të mësojë ndërkohë që kohët e fundit është stërvitur edhe nga trajnerët e tjerë të Vllaznisë.
Të gjithë janë të mendimit se Brendi Smajlaj është një talent i sportit të boksit që mund të ketë një karrierë shumë të suksesshme përpara. Nisja është e shkëlqyer.
Të jesh kampion i Shqipërisë që 18 vjeç, nuk është pak.Por prej këtij sportisti duhet të presim shumë më tepër sepse talentin dhe mundësitë i ka.
© shkodrasport.com
