Ka dalë si trajner nga Vllaznia, por ka provuar të drejtojë në disa qytete të tjera, përfshi këtu Shqipërinë dhe Kosovën. Samuel Nikaj, aktualisht është trajner i Vushtrisë, skuadër që ka marrë përsipër ta ngjisë një kategori më lart, ashtu siç ka bërë më parë me Flamurtarin e Prishtinës, Vushtrinë edhe një herë tjetër apo edhe me Kastriotin e Krujës.
Në një prononcim për mediat, ai foli për situatën aktuale te Vllaznia, ku u shpreh se ka qenë kundër largimit të trajnerit Brdariç.
“Shiko, me thënë të drejtën, duke u nisur edhe nga pozicioni i trajnerit, unë kam qenë kundër largimit të Brdariç. Jo se është trajner më i mirë se Plori, biles, unë nuk kam qenë për të ardhur Brdariç në Shkodër.
Trajnerët e huaj, nuk është se kanë bërë ndonjë mrekulli në Shkodër, as në Shqipëri, në përgjithësi. Nuk është se trajnerët e huaj, që kanë ardhur, kanë ardhur nga një nivel i lartë. Po ta shikosh CV e Brdariç, nuk ka pasur ndonjë CV të mirë, që të vijë aty. Por Brdariç solli një frymë tjetër te Vllaznia.
Pati sukses, sidomos pasi vinim prej 10 vitesh të dështuara, doli nënkampion me pikë të barabarta. Fitoi Kupën e Shqipërisë dhe ishte në objektiva. Për mendimin tim, largimi ishte i padrejtë. Kishte mundësi sa të duash për të rikuperuar.
Megjithatë, nuk jam dakord edhe me pjesën tjetër tani, që e sulmojmë Plorin, sepse nuk sulmohet trajneri për një ndeshje. Domethënë, një ndeshje del prej kontrollit, ka 100 mijë arsye.
Ka humbur Brazili 7-1 me Gjermaninë, humbi Reali 4-0 me Barcelonën. Tani nuk mundemi të kryqëzojmë një njeri aty për aty, aq më pak, që është trajner, që e ka merituar, t’i jepet mundësia.
Ndoshta, e ka merituar edhe më herët për ta drejtuar Vllazninë. Tani, ka përpara edhe 10 ndeshje dhe unë kam besim se trajneri Plori, mund të bëjë diçka.
Duhet të goditet aty ku duhet, jo te Plori, sepse Plori është i fundit që duhet të goditet mendoj unë”,-tha gjatë prononcimit të tij, trajneri shkodran Samuel Nikaj.
Maringlen ZHIVANI
