Asnjë shkodran nuk do të krenohej me Vllazninë, jo vetëm me rezultatet e kampionatit, jo vetëm pas humbjes në Kupën e Shqipërisë, por në tërësi me këtë klub që ka vite që trumbeton me të madhe shenja rrënimi.
Pa e ulur ritmin, trajneri i Kastriotit, ish-trajneri i Vllaznisë disa vite më parë, Samuel Nikaj, flet për EDS dhe shpreh irritimin, keqardhjen dhe mllefin për atë që i shohin sytë. E quan të turpshme atë që sheh në fushë. Fajtor për të nuk janë trajnerët, por ata që menaxhojnë këtë ekip.
Në një intervistë për portalin eduasportin.com, Nikaj flet shkurtimisht për këtë gjendje dhe më pas ndalet te Kastrioti, skuadra që po drejton me profesionalizëm, të cilën po e mban në krye të tabelës së renditjes në Grupin A të së Parës, duke kërkuar me ngulm kthimin në elitë.
E prisnit një ballafaqim të tillë mes Tiranës dhe Vllaznisë?
Sinqerisht prisja më shumë nga Vllaznia. Është gjynah që ka arritur në këtë pikë. Tiranën e pash shumë mirë, ekip i konsoliduar dhe shumë i formuar.
Ku çaloi Vllaznia në këtë ndeshje?
Vllaznia ka humbur atë që quhet ADN-ja shkodrane. I ka humbur dëshira për fitore, për luftë sportive. Është turp të shohësh këtë performancë. Është turp për mua si shkodran dhe është çmenduri që të shohësh këtë performancë jashtëzakonisht të keqe të lojtarëve.
U largua Cungu, erdhi Gjoka, po shohim të njëjtat rezultate…
Realisht e kam shprehur edhe më parë, për trajnerët nuk kam çfarë të them sepse këta janë nga më të mirët në Shqipëri, por nuk po funksionon organizimi i klubit. Është thjesht një ndërmarrje e tillë dhe gjithkush sheh të përfitojë diçka për vete.
A ka shpresa Vllaznia që të kalojë këtë tur?
Me këtë rezultat e shoh shumë të vështirë kalimin e turit, por ajo që kam unë si dëshirë është që Vllaznia të kalojë te privatët edhe të shohim një skuadër të denjë për kompeticionet. Jemi tifozë të Vllaznisë dhe kemi dëshirë që ta shohim sa më lart.
Si po vazhdon eksperienca juaj te Kastrioti? A do të jeni vitin tjetër në Superiore?
Po punojmë të jemi në Superiore. Jemi mirë deri tani, edhe performancat janë të kënaqshme, ashtu edhe pikët e klasifikimi. Duam që të vazhdojmë sa më gjatë kështu. Pse jo, të bëhemi një Kamëz e dytë në Superiore.
