Pas një shtyrje disamujore, më në fund ka nisur procesi i shtrimit të tartanit në pistën e stadiumit “Loro Boriçi”. Materiali i duhur ka dy ditë që ka mbërritur në Shkodër dhe vetëm paraditen e sotme ka nisur puna për shtrimin e tij. Nga informacionet që mësohen, bëhet e ditur se firma që ka fituar tenderin për të bërë këtë proces, do të bëjë çmos që të paktën për pjesën e pistës përpara tribunës qendrore, të bëhet e mundur shtrimi i tartanit deri më 9 tetor, datë kur siç dihet në këtë stadium do të luajë Shqipëria ndaj Italisë.
Megjithatë kjo nuk është shumë e sigurtë sepse edhe me datat 5-6 tetor, stadiumi do të jetë i zënë për shkak të ndeshjes që do të luajë kombëtarja kosovare në “Loro Boriçi””. Gjithsesi e rëndësishme është që ky proces do të marrë fund brenda pak ditësh dhe për këtë arsye, investimi në këtë stadium tashmë do të plotësohet thuajse krejtësisht.
© shkodrasport.com
