Shkodra shquhet për nxjerrjen e elementeve cilësore në të gjitha sportet dhe padyshim që edhe në futboll.
Ata kanë mbushur rradhët e ekipeve të Shqipërisë por prej disa vitesh edhe jashtë vendit.
Janë jo të pakët futbollistët të cilët luajnë nëpër ekipe të njohura të Europës e Botës.
Por atyre tashmë duket se do t’u shtohet edhe një futbollist tjetër. Bëhet fjalë për Devis Pajën. Mbrojtësi i talentuar shkodran i cili vetëm dy ditë më parë ka mbushur 18 vjeç, pritet të bashkohët tashmë me ekipin e Breshias në Itali.
Ai ka qenë edhe më përpara në provë tek kjo skuadër dhe nga sa mësohet, i ka kaluar të gjitha testet dhe tashmë pritet të bashkohet me këtë ekip.
Një gjë e tillë bëhet e ditur nga faqja zyrtare e “Albanian Ajax School”, pjesë e të cilës Paja ka qenë kohët e fundit.
Sipas saj, ndeshja e djeshme e ekipit AAS U-19 ndaj Portos, ka qenë e fundit për këtë futbollist sepse ai tashmë do të udhëtojë drejt Italisë për t’u bashkuar me skuadrën e tij të re.
Nuk ka shumë informacion në lidhje me këtë lëvizje, megjithatë e rëndësishme është se një futbollist shkodran do të bashkohet me Breshian.
Devis Paja prej disa sezonesh ka qenë pjesë e Akademisë Vllaznia ndërkohë që nga janari i vitit 2017 dhe deri dje, ka qenë pjesë e AAS.
© shkodrasport.com
