Trajneri i përfaqësueses shqiptare, Edi Reja,duket se ka vendosur që të mos i besojë sot nga minuta e parë një prej lojtarëve më vendimtarë për përfaqësuesen shqiptare në këto eliminatore pasi nga 16 golat e shënuar nga kuqezinjtë, 5 mbajnë firmën e tij.
Nëse Çikalleshi ka shënuar 4 gola, apo Balaj e Manaj nga 2, askush nuk është më vendimtar se Odise Roshit i cili është njeriu-gol i kësaj përfaqësueseje, duke llogaritur u edhe minutazhin e ulët në të cilin është aktivizuar.
Roshi ka luajtur në 6 nga 9 ndeshjet e këtyre eliminatoreve, për një total prej 288 minutash dhe në këtë periudhë kohore ka dhënë 4 asist e ka shënuar një gol, duke u bërë vendimtar për ekipin.
Mesfushori i kuqezinjve ka dhënë nga një asist në 2 ndeshjet ndaj Moldavisë si dhe dy të enjten ndaj Andorrës, duke shënuar vetëm një gol ndaj Islandës. Kjo do të thotë se çdo 58 minuta në fushën e lojës, ai është pjesëmarrës në aksionin e një goli kuqezi.
Gjithsesi, kjo nuk i ka garantuar atij një vend në skemën e Rejas për sot, pasi trajneri e sheh më shumë Roshin si një zëvendësues luksi për pjesën e dytë në duele ndaj skuadrave që imponojnë lojë, sesa një titullar, duke menduar që të përdorë shpejtësinë e tij në minutat e fundit, atëherë kur mund të bëjë diferencën. /vipsport/
