Zgjedhjet e reja për Presidentin e Federatës Shqiptare të Futbollit do të mbahen në datën 7 shkurt. Ashtu siç ishte paralajmëruar, Komiteti Ekzekutiv i Federatës Shqiptare të Futbollit është mbledhur në orën 11:00 të paradites së ditës së shtunë, ku në rend të ditës kishte pikërisht përcaktimin e ditës për zhvillimin e punimeve të Asamblesë Zgjedhore të futbollit shqiptar. Me anë të një njoftimi të shkurtër, fill pas mbledhjes, zyra për shtyp e federatës njofton se:
“Komiteti Ekzekutiv i FSHF-së, sikundër edhe është njoftuar ka përcaktuar datën 07.02.2018 si ditën e zhvillimit të punimeve të Asamblesë Zgjedhore të futbollit shqiptar. Kjo Asamble këtë radhë përvec pikave të rendit të ditës do të zgjedhë edhe organet e reja drejtuese të FSHF për 4 vitet e ardhëshme. Punimet e Asamblesë do të zhvillohen në hotel “Adriatik” në Durrës.
Anëtarët e Komitetit përcaktuan dhe miratuan edhe rendin e ditës së punimeve të Asamblesë”-përfundon ky njoftim. Në fakt ky është një vendim surprizë, pasi të paktën data e zgjedhjeve, nuk pritej të ishte kaq afër.
Gjithësesi brenda pak ditëve pritet të marrin fund dhe dilemat për kandidatët për kreun e ri të FSHF-së. Bashkim Fino është emri i parë jo zyrtar që pritet të kandidojë kundër Dukës, ndërsa vetë ky i fundit është shprehur më herët se do t`a marrë vendimin në kohën e duhur.
