Përveç Ansi Nikës, edhe një tjetër futbollist shkodran mund të lërë Kosovën për t’u rikthyer në Superligën shqiptare. Bëhet fjalë për mesfushorin Erjon Vucaj i cili siç dihet nga fillimi i këtij sezoni është bërë pjesë e kampiones në fuqi të Kosovës- Dritës së Gjilanit.
Për këtë futbollist, ka shfaqur interes Luftëtari i Gjirokastrës i cili në këtë mënyrë me afrimin e tij, kërkon të mbushë boshllëkun e krijuar nga largimi i fantazistit Rroca për tek Kukësi. Ende nuk është shumë e qartë nëse do të realizohet apo jo kjo lëvizje, megjithatë duhet pritur.
Në këtë mes janë disa gjëra për t’u sqaruar. E para, nëse Drita është dakord ta lërë lojtarin të largohet dhe e dyta, oferta financiare e gjirokastritëve nëse e bind apo jo mesfushorin shkodran.
Kjo e fundit në fakt ka disa dilema brenda sepse tek Luftëtari prej kohësh këtë sezon flitet për probleme për pagat dhe Vucaj nuk do ta nisë këtë aventurë pa marrë një garanci për ndryshimin e situatë. Ditët e para të janarit do të jenë përcaktuese për këtë gjë.
Merkatoja ende nuk ka startuar zyrtarisht dhe për këtë arsye, futbollistët dhe drejtuesit i kanë edhe pak ditë kohë në dispozicion për të bërë planet e tyre për vazhdimësinë e sezonit.
© shkodrasport.com
