Skuadra e Besëlidhjes ka arritur të prishë gjithçka sa i takon ecurisë së saj të mëtejshme në kampionat. Në mesjavën e kaluar, presidenti i ekipit Gjokë Noka ka larguar nga drejtimi i skuadrës trajnerin Ridvan Kulli dhe një situatë e tillë ka bërë që skuadra të humbasë dje në Krujë ndaj Kastriotit dhe tashmë shanset për t’u ngjitur në Superligë janë gjithnjë e më të pakta për lezhjanët. Historia e kësaj polemike ka nisur pasditen e së mërkurës pasi skuadra ka kryer ndeshjen e kontrollit.
Trajneri Kulli ka futur në formacionin e parë sulmuesin Malo ndërkohë që ka lënë në stol sulmuesin serb Bajiç. Kjo gjë nuk i ka pëlqyer presidentit Noka që i ka kërkuar trajnerit të aktivizonte serbin por kjo nuk i ka pëlqyer numrit 1 të pankinës i cili ka theksuar se për formacionin vendos ai. Kjo nuk i ka pëlqyer njeriut që hedh paratë tek kjo skuadër dhe i nervozuar i ka kërkuar Kullit të largohet, madje të marrë me vete edhe djalin, Jurgenin që e ka futbollist në këtë skuadër. Kështu ka ndodhur dhe dyshja Kulli është larguar nga skuadra por presidenti Noka mësohet të jetë penduar për veprimin e bërë dhe për këtë arsye të nesërmen ka dashur ta kthejë atë por këtë herë ka qenë trajneri Kulli që nuk ka pranuar. Një situatë e tillë kuptohet që ka patur ndikimin e vet tek skuadra dhe ajo është mundur dje në Krujë 0-1 nga Kastrioti. Me këtë humbje, Besëlidhja ka lëshuar edhe vendin e dytë në renditje dhe tashmë shanset për t’u ngjitur në Superligë janë gjithnjë e më të pakta.
© shkodrasport.com
