Ecuria e ekipit të Veleçikut në këtë sezon në kategorinë e parë ku merr pjesë, ka qenë përgjithësisht e mirë teksa i ka fituar të katër ndeshjet e luajtura në fushën e vet. Si rrjedhojë me 12 pikë renditet në vendin e pestë, një pozicion komod për të.
Për këtë ecuri, meritat janë kryesisht të skuadrës, trajnerit Besnik Duli dhe të futbollistëve por në fakt njeriu që “anashkalohet” ndoshta është drejtori teknik Nuri Rexha.
Kryebashkiaku Tonin Marinaj që mban edhe rolin e presidentit të klubit, ia ka besuar atij gjithçka sa i takon ndërtimit të skuadrë. Dhe Rexha, falë përvojës së tij të madhe si futbollist i Veleçikut por edhe i Bylisit në Superligë, me të cilin madje luajti edhe në Kupat e Europës, po e tregon veten edhe në rolin e drejtuesit.
Në një bashkëpunim të ngushtë me trajnerin Duli dhe me fondet që kanë patur në dispozicion, të cilat duhet pranuar se nuk kanë qenë të mëdha, kanë arritur të përzgjedhin lojtarët e duhur për ekipin.
Dhe deri më tani çdo gjë po shkon mirë. Nëse e mban vendin e pestë deri në fund të fazës së dytë, do të ishte diçka e shkëlqyer sepse do të arrihej objektivi që Veleçiku ka.
Drejtori Rexha beson për këtë gjë dhe tashmë i mbetet të shohim ecurinë e skuadrës në 10 ndeshjet e mbetura deri në fund të fazës së dytë.
© shkodrasport.com
