Oliver Kahn konsiderohet si portieri më i mirë në historinë e futbollit, ndaj fjala e tij ka ende peshë të jashtëzakonshme. Nisur nga vazhdimësia dhe dominimi 15 vjeçar në fushën e futbollit, Leo Messi dhe Cristiano Ronaldo konsiderohen si lojtarët më të mirë të historisë.
Megjithatë, legjendari Kahn ka një mendim tjetër dhe beson se një figurë ikonë ishte shumë përpara argjentinasit dhe portugezit që janë ende aktivë në futbollin e luajtur.
Po flasim për të famshmin Ronaldo Nazario da Lima, i cili nuk qëndroi aq gjatë sa Messi dhe CR7, por në vetëm disa sezone të mira arriti të lërë një përshtypje të jashtëzakonshme.
“Për mua, Ronaldo ishte shumë më i mirë se Messi dhe Cristiano. Unë ende e shikoj atë si lojtarin më të kompletuar ndonjëherë, braziliani ishte lojtari më i mirë që kam parë ndonjëherë”, tha Kahn. /Sport Ekspres/
