Nga Klevis Bejkolli
Çudi e madhe, u mbushën studiot me analistë dhe specialistë futbolli. Të gjithë vunë kujën: U bë nami në stadiumin “Skënderbeu”. Dinamo City paska bërë një krim të rëndë, paska toleruar skuadrën korçare, madje duke “hapur shalët” dhe lejuar 4 gola. Askush nuk sheh të dyja anët e medaljes, edhe faktin tjetër se Dinamo City e ka realizuar gjysmën e objektivit, për të qenë në “final four”, ndaj tani ka gjithë të drejtën të racionalizojë forcat, të ruajë titullarët sa të mundet për sprintin final, aty ku vendoset tituli kampion.
Pastaj, në ndeshje ku rezultati nuk ka rëndësi madhore, pse të mos iu jepet mundësia edhe elementëve të rinj, atyre që nuk kanë luajtur sa duhet gjatë sezonit. Ilir Daja është një strateg dhe di t’i bëjë mirë llogaritë, sepse te dera ka ndeshjen e Kupës së Shqipërisë. Në një situatë të tillë, pse duhej të “shtrydhte” formacionin e vet titullar në transfertën korçare, ku pikët nuk ishin “jetë a vdekje”?
Sipas jush, specialistë të “kujës” mediatike, dinamovitët duhet të bënin “vetëvrasje” para përballjes me Vllazninë në “Loro Boriçi”, më 2 prill. Pra, “t’i linin kocat” në Korçë, në një ndeshje pa asnjë rëndësi për ta?! Mos vallë pretendoni që Daja t’ua lërë në dorë formacionin që hedh në fushë gazetarëve, analistëve, gjithollogëve nëpër ekrane televizive, që bëjnë të gjithëditurin dhe marrin nëpër gojë kë t’iu dalë përpara? Si ka mundësi që kërkoni “gjilpërën në kashtë” në një ndeshje që për dinamovitët ishte formalitet, me mendjen dhe energjitë të fokusuara tërësisht te Kupa e Shqipërisë dhe “final four”.
Objektivat dhe strategjitë e një klubi futbolli i vendos presidenti, trajneri, stafi teknik, edhe strategjitë për të arritur aty ku duhet përcaktohen po nga ata. Ata janë të zotët e punës, shpenzojnë para, energji të përditshme, gjithçka. Atëherë, ata u dashka “ta hedhin vallen” sipas midesë mediatike të gjithkujt, që bën gazetarin, opinionistin, specialistin “majë krahu”? Çfarë të bëjë një trajner, të fusë juve në fushë, kur ka 6 apo 7 lojtarë të dëmtuar? Seriozisht e keni, duhet të rrezikojë për asgjë dhe të “hedhë në erë” një sezon të tërë, verdiktet e të cilit janë për t’u zbuluar në javët në vazhdim.
Sa lehtë e keni të dilni në përfundime, jo po skema, trukime, tolerime, “hapje shalësh” etj. etj. Disa prej këtyre pseudo-specialistëve apo gazetarëve janë po ata që “shkarkuan” Demollarin dikur në avion nga stoli i kombëtares, nuk ndryshojnë kurrë. Mezi presin rastin të nxijnë gjithçka për ndonjë “kothere” që mund t’ua hedhë ndokush, për ndonjë udhëtim jashtë shtetit në Kupat e Europës, ndonjë vend në tribunën VIP etj.
Natyrisht, ne jemi pro kritikës profesioniste, të drejtë dhe të vërtetë, kritikë që e stimulon dhe shëron futbollin, por nuk hyn në llogaritë e gjithkujt, nxin me një të rënë të lapsit cilindo.
Ne nuk marrim përsipër të bëjmë rolin e prokurorit e gjykatësit, por as “hedhim fall” nëpër ekrane, duke folur për tolerime e trukime pa pasur fakte. Hipotezat dhe “mastrubimet” televizive nuk kanë asgjë të përbashkët me “fair play”, faktet janë të shenjta dhe mund të “gozhdojnë” gjithkënd, edhe Dinamo City në rastin konkret, nëse ekzistojnë.
Llogaritë duhen bërë edhe duke u “futur në lëkurën” e dinamovitëve. Ata kanë një ndeshje shumë të rëndësishme te dera, transfertën ndaj Vllaznisë, ku do të diskutohet shkuarja në finale të Kupës së Shqipërisë. Kësisoji, të gjitha energjitë e çdo ekipi do të rezervoheshin për këtë ballafaqim, në kushtet kur në kampionat i ka përmbushur qëllimet, pret me qetësi “final four”. Kupa e Shqipërisë, veç të tjerash, vlen pjesëmarrjen në Kupat e Europës, ku Dinamo City do të kthehet pas shumë kohësh, sipas të gjitha gjasave. Kjo ka rëndësi kapitale për klubin në aspektin financiar, për trajnerin Ilir Daja, për lojtarët, madje edhe fansat dinamovitë. Nëse nuk ju pëlqejnë të tilla llogari të klubeve, të cilat shpenzojnë pa fund dhe e zgjedhin vetë rrugën drejt qëllimit, le të bëjnë ekipin e vet këto kritizerë ekranesh të pashoq, ta shohin sa iu vlen lëkura…
Të gjithë e kemi thënë se Skënderbeu ka luajtur shumë mirë në ndeshjet e fundit, atëherë pse kryqëzohet se fitoi 4-1 ndaj Dinamos? Nuk e ka thënë Takaj, Demrozi, Bardhi, Hasanbelliu, Kapllanaj, Xhaferi, Demi, Halili se u tolerua në Korçë dje. Po, e thonë me gojën plotë gazetarët dhe specialistët, të cilët flasin si “e ëma e Zeqos majë thanës”, pa ditur problematikat e skuadrave, dëmtimet, pezullimet etj. Mos harroni se Skënderbeu ka mundur Partizanin dhe Egnatian në këtë kampionat, dy skuadra të tjera kryesuese dhe në garë për titullin kampion. Atëherë, pse jepet alarmi pas “pokerit” ndaj Dinamo City?
Pse nuk përdorni një kut matës, por sipas dëshirës dhe interesit. Objektivat e klubeve dhe rrugët drejt përmbushjes së tyre i bëjnë presidentët dhe stafet respektive, jo gazetarët e specialistët nëpër studio televizive. Edhe formacionin e bën trajneri, është kompetencë e tij, gjë për të cilën gjykohet në bazë të rezultateve. Duke qenë se Skënderbeu lufton për mbijetesë në Superiore, çfarë i duhej të mbante “dy kunguj nën sqetull”, të rivalizonte edhe në Kupën e Shqipërisë, kur rrezikon tw humbasë gjithçka. Zgjedhja është e qartë për korçarët, duan të qëndrojnë mes më të mirëve të vendit. Krejt ndryshe është qasja e dinamovitëve, të cilët janë në të drejtën e tyre të aktivizojnë edhe të rinjtë në një ndeshje, teksa janë sy e veshë nga sfida pasuese shumë e afërt, si ajo ndaj Vllaznisë, e cila mund të vlejë gjithë sezonin.
Pse duhet të rrezikonte Dinamo City në transfertën korçare, kur e ka siguruar vendin e dytë në kampionat dhe pret e qetë e duke ekonomizuar forcat “final four”. Si kudo në jetë, edhe në futboll ka prioritete, të cilat i vendosin të zotët e punës, jo ata që marrin nëpër gojë e nxijnë gjithçka e këdo.
