Rënia e Vllaznisë në Kategorinë e Parë, ishte një “dramë” në Shkodër. Një nga ato skena, që nuk pritej të luhej kurrë në “teatrin” ku kanë interpretuar yjet e futbollit shqiptar. Ndodhi për hir të së vërtetës dhe lotët në sytë e shkodranëve prekën mijëra zemra në gjithë Shqipërinë.
Ishte e njëjta situatë si me Tiranën e dy viteve më parë. Por pas “rrebeshit” ka gjithmonë diell, thotë një fjalë e urtë popullore. Në fakt edhe për Vllazninë kështu mund të cilësohet tranzicioni nga Superliga në Kategorinë e Parë.
Edhe pse ka një grup me rivalë jo në nivelin e saj, Vllaznia po di të rikthehet dinjitoze dhe ashtu si i takon këtij ekipi. Deri më tani ka luajtur 6-të sfidat në kampionat, duke i mbyllur të gjitha me fitore. Një bilanc super pozitiv për një skuadër, që kërkon të rikehet sa më parë në fronin e më të mirave.
Arkitekti i këtij suksesi është padyshim një njeri, që sfidat i njeh mirë dhe u del përball. Ndonëse u kontestua, u bë dhe çështje në kohën kur emri i tij u përfol se do të drejtonte klubin në Kategorinë e Parë, tashmë të gjithë duhet t`i heqin kapelen.
Pikërisht strategu Hasan Lika, është arkitekti që po ndërton rrugën e rikthimit në elitë të Vllaznisë, duke i marrë më të mirën grupit të lojtarëve që ka. Edhe pse merkato nuk ishte nga ato që do të dëshironte trajneri, fjalë pak e punë shumë, Vllaznisë po i rikthen dinjitetin.
Sezoni është ende i gjatë dhe me shumë sfida rrugës, rikthimi i Vllaznisë në Superligë është çështje, që kërkon vetëm një disa muaj kohë. Situata është e ngjashme me Tiranën, e cila po ashtu në gjashtë javët e para të Kategorisë së Parë në sezonin e shkuar, korrte vetëm suksese. E vetmja humbje e regjistruar ishte ajo ndaj Bylisit në javën e shtatë, por pas kësaj gjithçka fliste në favorin e ekipit bardheblu.
Emri që meriton respekt, mirënjohje dhe padyshim vlerësim jo vetëm moral, është Hasan Lika. Në fakt, edhe pse nën zë, të gjithë e pranojnë se trajneri aktual i Vllaznisë është një strateg i sukseseve me ekipet që drejton.
Provën e parë e dha vjet me Luftëtarin. Mori një skuadër nga vendet e fundit të renditjes, me moral të rënë përtokë, një ekip me shumë talente, por të shpërqëndruar totalisht./telesport/
