Shkodra vazhdon pa Muzeun e Sportit. Një histori që bën krenar çdo shkodran dhe çdo shqiptar. Në fakt, mendova të shkruaj dy fjalë për Muzeun e Sportit, duke parë ditët e fundit turistë të shumtë në qytetin tonë. Desha t’jua kujtoj këtë gjë drejtuesve të klubit Vllaznia që nuk kanë lidhje me futbollin dhe historinë e këtij klubi, por rastësia i ka vendosur aty gabim dhe shumë shpejt gjërat do të shkojnë në vend të vet.
Po ashtu, dua t’i them zyrës së sportit në Bashki që duhet projektuar një muze shumësportësh, gjë që e kërkon opinioni sportiv. Të kujtohet historia dhe kontributi i çdo individi. Ekipit të Vllaznisë ndoshta i mjafton një like te faqja e Kryetarit të Bashkisë, Benet Beci dhe mbaroi puna për sot. E kam theksuar edhe para një viti për Muzeun e Sportit në një emision sportiv, por asgjë.
Çdo gjë ka rënë në vesh të shurdhër. Prandaj, vlerësoni kërkesën e tifozërisë shkodrane dhe figurave të sportit. Mos dilni kur vijnë fushatat elektorale sikur po bëjmë këtë, po bëjmë atë. Ku jeni sot? Asgjë nuk është bërë. Shpresoj që mos të dështoni si për fushat dhe ambientet në Uzinën e Telave. Duhen ndërtuar ambiente sportive të të gjitha sporteve, ku rinia ka argëtim dhe pasion sportin, të ketë ambiente me standarte.
Rinia t’i largohet rrugëve dhe veseve negative, drogës dhe alkoolit, të merren me aktivitete fizike. Shpresoj që kryebashkiaku Beci ta mbajë premtimin dhe të mos bëjë gabimet e paraardhëse, ish-kryebashkiakes Voltana Ademi që e shkatërroi sportin për 10-vite me rradhë. Muzeu i Sporteve është vlerë dhe atraksion turistik. Ambientet janë gati rreth stadiumit.
Kujt i prishen interesat që nuk ndërtohet? Shpresoj që ky apel i imi të mos bjerë në vesh të shurdhër. Po, kam edhe një thirrje për znj. Amila Gjyrezi të Zyrës së Sportit që vjen nga fusha e Kulturës. Zonjë e dashur që keni kaluar nga Partia Demokratike në Partinë Socialiste, nuk iu vret ndërgjegjia juaj për Muzeun e Sporteve? Nëse bëhet Muzeu i Sporteve, do të jetë risi për Shkodrën. Nëse jo do të jetë një realitet i hidhur për sportin dhe qytetin…
