E ka pritur me kërshëri shortin e sotëm dhe ndonëse nuk ka qenë ai i preferuari për Vllazninë, sërish është optimist për vazhdimësinë. E kemi fjalën për presidentin e ekipit të futbollit të femrave Lazer Matija.
Presidentin e atij ekipi që tre ditë më parë bëri krenarë të gjithë shqiptarët me atë kualifikim dramatik të arritur ndaj kampiones turke ALG Spor.
“Shkodra Sport” i ka marrë një mendim z. Matija në lidhje me shortin e hedhur dhe kundërshtarin e rradhës, FC Minsk për të cilin ka thënë:
“Në fakt unë kam dëshiruar që të kishim përballë kampionen e Rumanisë dhe nuk kishte rëndësi se ku do të luanim këtu apo atje, por isha i bindur se atë do ta kalonim.
Sa për ekipin e Minskut, përderisa është i renditur i dyti në listën e 20 ekipeve pjesmarrëse të këtij turi, tregon qartë se ka një nivel të lartë.
Menjëherë jemi vënë në lëvizje për të mësuar më shumë në lidhje me këtë kundërshtar me të cilin do të luajmë pas dy javësh në Shkodër dhe konstatojmë se Minsku në rradhët e tij ka tre lojtare të kombëtares ukrainase, pesë lojtare të kombëtares së bjellorusisë si dhe katër lojtare afrikane.
Megjithatë ne jemi Vllaznia dhe tashmë kemi edhe ne profilin tonë edhe në Europë. Do punojmë fort gjatë kësaj periudhe për ta përgatitur si duhet këtë ndeshje dhe padyshim që do të tentojmë kualifikimin për në turin e tretë të Ligës së Kampioneve të Europës”./SHKODRA-SPORT.COM/
