Situatë kaotike në miqësoren e sotme të Bajer Leverkusenit ndaj Vupertal, si pjesë e përgatitjeve për sezonin e ri. Futbollisti i përfaqësueses gjermane, Kevin Belarabi, ka pësuar kolaps duke alarmuar të gjithë të pranishmit pasi nuk ka ndodhur gjatë lojës, por kur po qëndronte para pankinës.
Futbollisti i cili ka veshur në 11 ndeshje fanellën e Gjermanisë, kishte luajtur në pjesën e parë të takimit dhe pas pushimit të ndeshjes po kthehej për t’u ulur në pankinë kur është rrëzuar papritur para shokëve të skuadrës.
Stafi mjekësor i ka dhënë menjëherë ndihmën e parë dhe më pas ambulanca e ka shoqëruar në spital lojtarin, me ndeshjen që është ndalur për disa minuta pasi të gjithë dëshironin të dinin për situatën e futbollistit.
Pas ndeshjes, drejtori i Bajer Leverkusen, Rudi Fëler, ka deklaruar se situata ishte normalizuar disi. “Ai është i ndërgjegjshëm, shpresojmë që të mos ketë asgjë shqetësuese”, tha ai. Sipas mediave gjermane, fajin për këtë situatë e kishin temperaturat e larta që i shkaktuan lojtarit marramendje. /vipsport/
