Në takimet e fundit të Shqipërisë, ankesa dhe problemi më i madh ka qenë sulmi, sidomos pas dëmtimit të Armando Sadikut dhe Odise Roshit. Në sfidën ndaj Izraelit, vendimtar ishte goli i shënuar nga Xhaka, ndërsa në Skoci mungoi goli.
Këtë radhë, duket se gjërat kanë ndryshuar për Kombëtaren, duke qenë se talenti i Shpresave, Fiorin Durmishaj po shkëlqen në kampionatin grek dhe ditën e sotme, ka shënuar dy gola në fitoren 0-2 në transfertë përballë Smyrnisit. Në minutën e 37, Durmishaj ka zhbllokuar rezultatin, ndërsa në minutën e 50 ka arritur të dyfishojë.
Sulmuesi 21-vjeçar ishte i grumbulluar nga tekniku i Shpresave, Alban Bushi në takimin ndaj Spanjës, ndërsa në miqësoren me Italinë, ai u largua duke mos qenë pjesë e skuadrës si pasojë e një dëmtimi.
Në takimin e sotëm, Durmishaj është aktivizuar si titullar dhe ka luajtur për 90 minuta. /Vipsport/
