Disfata e pësuar pasditen e së hënës në Kukës, nuk është pritur mirë tek Vllaznia. Pjestarët e saj mendojnë se ajo ishte e padrejtë dhe erdhi si pasojë e arbitrimit të njëanshëm.
Interesant fakti se edhe humbja tjetër e fazës së tretë të kampionatit, ajo në Laç, ka ardhur përsëri pas një vendimi të kontestueshëm të arbitrit.
Në këto rrethana, vështirësia e garës duket se po rritet gjithnjë e më shumë. Por ndërkohë tashmë që kampionati është ndërprerë për shkak të ndeshjes së kombëtares, trajneri Ernest Gjoka ka marrë një vendim për futbollistët e tij.
Ai ka vendosur t’i lërë pushim ato për dy ditë me rradhë. Pra, sot kanë qenë pushim por do të jenë edhe nesër dhe vetëm të enjten do t’i rikthehen stërvitjes.
Kjo në fakt ka qenë shumë e nevojshme. Javët e fundit kanë qenë shumë të lodhshme si pasojë e ngjeshjes së kalendarit dhe po ashtu, disa prej futbollistëve kanë patur edhe probleme me dëmtimet.
Për këto arsye, duhej një pushim i tillë, me shpresën që do të shërbejë për mirë të gjithëve. Një periudhë edhe për të reflektuar dhe për të nisur më pas përgatitjet për sfidën e rradhës me Skënderbeun.
© shkodrasport.com
