Ndeshja e sotme mes Fraiburg dhe Borusia Mynshengladbah ka dhuruar një rezultat surprizë pasi në mënyrë të papritur, skuadra e cila luftonte për t’u ngjitur në kreun e renditjes përkrah Borusias së Dortmundit, është mposhtur 3-1 nga vendasit. Gjithçka ka ardhur pas një ndeshje mjaft të çuditshme e cila nisi me penallti pas 13 sekondash lojë.
Që në fillimin e ndeshjes, pas shkelmimit të parë të topit, Fraiburg fitoi penallti me gjyqtarin Hartman që nuk hezitoi të bënte shenjë nga pika e bardhë pas faullit të portierit Zomer, ndonëse kishin kaluar vetëm 13 sekonda lojë.
Petersen ekzekutoi saktësisht duke kaluar në avantazh të tijtë, në atë që ishte penalltia e dytë më e shpejtë në historinë e Bundesligës.
Rekordi mbahet nga ndeshja mes Hamburgut dhe Paderborn në vitin 2015, kur Hamburgu fitoi penallti pas vetëm 8 sekondash lojë.
Në vijimin e ndeshjes, një penallti e Torgen Hazard vendosi barazpeshën kur regjistrohej minuta e 20. Por Valdshmid dhe Holer shënuan dy gola të tjerë për vendasit në pjesën e dytë, duke siguruar suksesin 3-1 që largon Fraiburgun nga vendet e poshtme të klasifikimit dhe i heq mundësinë Borusias që të arrijë Borusian tjetër në kreun e renditjes së Bundesligës. /vipsport/
