Tjetër problem për Vllazninë. Përmbarimi gjyqësor ka mbërritur këto ditë në zyrat e klubit të futbollit Vllaznia. Arsyeja është vendimi për pagesën ende të papaguar të këtij klubi në adresë të ish-futbollistit të saj Suad Lici. Ky i fundit ka fituar gjyqin me klubin diçka më tepër se një vit më parë. Që atëherë, klubi shkodran nuk ia ka kaluar në numrin e tij të llogarisë shumën prej 31 mijë dollarësh që ai ka fituar në gjyq si pasojë e një mospagesës së kontratës të tij që në vitin 2005. Ka qenë Dhoma e Zgjidhjes së Konflikteve pranë FSHF-së që i pat dhënë të drejtë ish-futbollistit në vendimin e tij. Lici, duke parë se klubi nuk kishte ndër mend t’i bënte likujdimin e kësaj shume, ka angazhuar një firmë private të Përmbarimit për mbledhjen e këtij borxhi. Përfaqësues të kësaj firme kanë mbërritur në zyrat e klubit dhe kanë lënë afatin se deri kur duhet ta paguajë këtë shumë përndryshe do të bëjë bllokimin e numrave të llogarisë dhe gjithë pasurive të tjera të tij. Në këtë mënyrë për drejtuesit e klubit ka dalë në skenë edhe një telash tjetër teksa me shumë siguri, ata do bëjnë një tjetër kërkesë për shtesë fondi në mbledhjen e rradhës të Këshillit Bashkiak për të paguar 31 mijë dollarët e Suad Licit.www.shkodrasport.com
