Përtej humbjes

Opinion nga Blendi DIBRA

Humbja e Vllaznisë ditën e mërkurë ndaj Flamurtarit përtej humbjes së një ndeshje sportive ishte një humbje për të gjithë qytetarët e Shkodrës. Them për të gjithë qytetarët e Shkodrës pasi ekipi i Vllaznisë aktualisht financohet me paratë e taksapaguesve shkodranë. Duhet thënë se nuk është një shumë e vogël por janë rreth 500 milion lekë të akorduara nga Bashkia Shkodër për të financuar një ekip që nuk përmbushi asnjë objektiv. Janë para të shpenzuara të cilat nuk i shërbyen as investimit në brezin e ri të futbollistëve shkodranë ku në krye të listës së pagesave janë futbollistë të huaj të cilët janë jo pak por 8 të tillë. Janë para të cilat nuk i shërbyen as përmirësimit të kushteve të brendshme dhe të jashtme të stadiumit. Janë para të shpenzuara të cilat nuk i shërbyen as argëtimit të qytetarëve shkodranë ku numri i spektatorëve çdo ndeshje e më shumë po zvogëlohet etj, etj. Duhet theksuar që periudha e deritanishme kaloj në shumicën e kohës së saj në situata konfliktuale ku herë dëgjoheshin debate mes lojtarëve dhe drejtuesve, mes lojtarëve dhe trainerit, mes trainerit dhe drejtuesve, mes trainerit dhe albitrave, mes drejtuesve dhe tifozëve, mes trainerit dhe gazetarëve etj. Politika e ndëshkimit më tepër u përdor si një mjet “hakmarrje” sesa një proçes edukimi, ku më flagrantja ishte lënia jashtë dyerve të stadiumit në disa ndeshje të grupimit “Vllaznit Ultras” ku në vend të komunikimit dhe bindjes u përdor rruga më e shkurtër ajo e “përjashtimit”. Si përfundim mos përmbushja e objektivave tregoj që menaxhimi i këtyre situatave nuk u bë në mënyrë të drejtë duke mbajtur të ndezur një frymë konfliktuale dhe mosbesimi në ekip dhe jasht tij.

Në përgjithësi është fakt i pamohueshëm që klima që mbizotëron qoftë në klubin e futbollit Vllaznia si dhe në opinion publik është një klimë mosbesimi prandaj është detyrë kryesore për të rindërtuar menjëherë frymën e besimit dhe bashkpunimit. Një alternativë e dobishme për ta bërë këtë është dalja publike e drejtuesve aktualë për të shpjeguar në mënyrë transparente arsyet kryesore të mos arritjes së objektivave si dhe përvojën e fituar për ti evituar ato në të ardhmen. Në vazhdën e këtij proçesi si dhe me synimin për të dalë nga gjendja aktuale duke marre parasysh edhe direktivat e UEFAs të cilat janë për të trajtuar klubet e futbollit si sipërmarrje biznesi ku në fund të sezonit bilanci i tyre duhet të rezultojnë pozitiv, pra fitimprurës. Duke qënë se në këtë aspekt për klubin e futbollit Vllaznia ky sezon tregoj një zhgënjim më vehte, përtej humbjes të së mërkurës drejtuesit aktuale duhet që të analizojnë me urgjencë mënyrën e shpenzimit të parave jo vetëm në aspektin ligjorë, ku duhet theksuar që Bashkia Shkodër ka qenë model në Shqipëri, por edhe në atë të përmbushjes së objektivave sportive dhe argëtimit të publikut, duke shikuar përtej humbjes dhe drejt projektimit të së ardhmes.

Besoj që tashmë edhe për drejtuesat e Bashkisë është krejtësisht e qartë që një sipërmarrje e tillë kaq e madhe dhe delikate siç është një klub futbolli është e pamundur që të menaxhohet në mënyrë të drejtpërdrejtë nga një autoritet publik duke bërë të mundur njëkohësisht edhe arritjen e objektivave. Prandaj ndërhyrja duhet që të bëhet e studiuar ku tashmë del si emergjencë zhvillimi i proçesit të shitjes së aksioneve duke kaluar në privatizimin e plotë të klubit të futbollit “Vllaznia”. Në këtë mënyrë do të përmbushej edhe objektivi i parë i menaxhimit të drejtë të parave të taksapaguesve shkodranë duke eleminuar një shpenzim të konsiderueshëm. Do të ishte në të mirën e klubit dhe në përgjegjësinë e Bashkisë që ky proçes të kryhej përpara fillimit të sezonit në mënyrë që drejtuesit e rinj të shoqërisë aksionere të kishin kohën e mjaftueshme për të ndërtuar një ekip të denjë.

Një tjeter objektiv mjaft i rëndësishëm cili përkon më shume me funksionet kryesore të Bashkisë Shkodër është trajtimi me prioritet i rehabilitimit të zonës përreth objektit më të rëndësishëm sportiv të qytetit, stadiumit “Loro Boriçi”. Është e pafalshme që në Shkodrën e djepit të kulturës, në Shkodrën ku futbolli mësoi të flasë shqip, të kemi një stadium në ato kushte të mjerueshme. Prandaj duhet patjetër të jetë në prioritetet e Bashkisë përmirësimi i infrastrukturës jashtë stadiumit dhe i kushteve brenda tij duke e bërë atë një vend të mirëfilltë të zhvillimit të shfaqjeve sportive, kulturore artistike si dhe argetimi për spektatorët të cilët ndjekin shfaqjet sportive duke rritur ndjeshëm numrin e tyre.

Koha tashmë ka filluar debatet nuk mungojnë por ato duhen orientuar në frymën e bashkpunimit dhe diskutimit të alternativave më të mira për të patur një Vllazni të denjë për sezonin e ardhshëm!