Të mërkurën do të luhet ndeshja e Kupës së Shqipërisë në mes Vllaznisë dhe Kamzës, por dy ditë përpara ende mbetet enigëm vendi se ku do të luhet ajo.
Arsyeja është se stadiumi “Loro Boriçi” nuk është ende plotësisht gati për të pritur një ndeshje futbolli për shkak të borës së rënë dhe lagështirës së madhe që është në të.
Drejtuesit e klubit shkodran po monitojnë situatën e këtij impianti sportiv dhe kuptohet që dëshira është për ta luajtur aty këtë ndeshje, por nëse është e pamundur, pastaj ajo do të spostohet për në fushën “Reshit Rusi”.
Kjo e fundit është bërë funksionale prej dy ditësh dhe ekipi shkodran po stërvitet aty. Gjithsesi, do të jetë dita e martë ajo që do të saktësojë përfundimisht vendin ku do të luhet takimi i kupës, në “Loro Boriçi” apo në “Reshit Rusi”.
Bora thuajse është shkrirë tërësisht në stadium, megjithatë kjo ka krijuar një lagështirë të madhe, e cila është e dëmshme për tapetin e tij.
Në këtë mënyrë, bashkë me specialistët e terreneve sportive, ditën e martë do të merret vendimi përfundimtar nëse do të mund të luhet aty apo jo.
© shkodrasport.com
